Скопје, 17 февруари (МИА) - Во Чифте амам на 17.02. 2010 година, беше промовирана Програмата за ревитализација на Старата скопска чаршија  за периодот 2010-2015, подготвена од Националниот совет формиран од Владата за да го коороднира реализирањето на иницијативите и активностите на сите институции надлежни и вклучени во заживувањето на чаршијата.

Таа е стратешки документ што ќе овозможи преземање долгорочни мерки за ревитализација, одржлив развој, стопанско и културно реактивирање на чаршијата, зачувување на нејзиниот идентитет и афирмација за натаммошен развој.

Во присуство на премиерот Никола Груевски, стручни лица и меѓународни претставници, програмата  ја презентираше претседателка на Националниот совет Јасминка Хаџиева-Алексиевска. Таа опфаќа четири стратешки развојни подрачја - занаети, одржлив туризам, култура и угостителство и трговија. За секое има акциски план. Се предвидуваат трговски и даночни олеснувања за занаетите и субвенции за оние кои се значајни за идентитетот на чаршијата, формирање туристичко-информациски центар, отворање мали продавници и угостителски објекти со традиционална храна, пансиони за студенти, реанимирање со многу културни содржини, меѓународна соработка и бесплатна понуда на простори во чаршијата на земји или градови кои некогаш влијаеле на неа, како Истанбул, Венеција, Дубровник...

Хаџиева-Алексиевска рече дека приоритети се кохезија на чаршијата со град Скопје, институционално јакнење, нови извори на финансирање, јавно-приватно партнерство за услужните дејности, подигање на свеста на граѓаните за значењето на чаршијата.

Министерката за култура Елизабета Канческа-Милевска потсети на Законот за старата чаршија донесен во 2008 година, со кој се уредуваат клучните прашања за практичните аспекти  на заштитата на таа споменична целина  како конгломерат на култури и профани и сакрални објекти од средниот век и составен и незаменлив дел на модерно Скопје.

- Со ревитализацијата ќе се овозможи општ развој на заедницата во чаршијата, но и на сите луѓе кои тука ќе доаѓаат да работат, учат или да го поминат слободното време. До Министерството за култура се пристигнати повеќе иницијативи за доделување простор во старата скопска чаршија кои во моментов се разгледуваат, се со цел да се доделат  на  користење на заинтересираните субјекти од областа на културата, кои ќе придонесат за заживување на ова јадро, рече Канческа-Милевска. Таа соопшти дека со партнери од Франција е почнат и процес за инвентаризација на чаршијата и оти во 300 од 650 одделени објекти таа е завршена.

Градоначалникот на Чаир Изет Меџити информираше за активностите  што неговата општина ги презела за  ревитализација на чаршијата, констатирајќи нејзина запоставеност во изминатиот период.  -  Нам, како нова генерација, во аманет ни е оставена благородна задача да го зачуваме ова богатство, да му ги зголемиме вредностите и да го оставиме на  идните генерации како доказ за различни историски периоди, но и како доказ за вековниот соживот на овие простори, рече Меџити.

Со програмата е отворена и веб-страница www.skopskacarsija.gov.mk и е изработен спот од Сојузот на стопанските комори и Кинотеката на Македонија. хс/са/15:15