ТРЕНД ВО НАШИТЕ KНИЖАРНИЦИ
Бестселерите на англиски се бараат повеќе од преведените
Најмногубројни купувачи на дела на англиски јазик се тие што подобро го зборуваат јазикот, односно тие на возраст од 30 до 40 години
„Игра на престоли“ од Џорџ Мартин, „Педесет нијанси сиво“ на Е.Л.Џејмс, „Хобит“ се најпродаваните дела на англиски јазик во домашните книжарници. Од книжарниците велат дека се бараат дела на англиски, а особено светски бестселери и екранизирани книги, кои ги разграбуваат побрзо отколку истите преведени на македонски. Литература на англиски јазик најмногу купуваат тие што подобро го зборуваат јазикот, обично тие на возраст меѓу 30 и 40 години. Во последно време е зголемена побарувачката на тинејџерската литература.
Голем избор
Во книжарниците на „Икона“ и во Англискиот центар се продаваат оригинали на англиски јазик. Kласиците кај нив може да се најдат за релативно многу ниска цена. Од „Икона“ велат дека повеќе се купуваат книги на англиски отколку на македонски јазик и дека односот е 70 наспроти 30 отсто во корист на делата на англиски.
- Ние имаме поголем избор на англиски јазик и можеби затоа кај нас се такви податоците. Најчесто литература на англиски купуваат луѓе во средни години. Најмногу ги купуваат Џорџ Мартин и делата од серијалот „Игра на престоли“, а и „Господар на прстените“, „Хобит“ - велат од „Икона“.
Интересно е што одлично се продаваат и комплети книги кои чинат и повеќе од 3.500 денари. Дел од книгите е преведен и на македонски јазик, а сепак интересот за истите на англиски е еднаков, за некои дела и поголем.
Англискиот центар од добитници на Нобелова награда, на наградата „Оринџ“, дебитанти, награди во областа на научната фантастика и слично. Имаат купувачи од 18 до 50 години, а голем интерес има и за тинејџерска литература.
Мишо Лазески од Англискиот центар вели дека продажбата е солидна, но дека најмногу се чита од неопходност.
- Најмногу се продаваат бестселери и тоа што ќе се види на телевизија тоа и се бара. Најмногу ги купуваат „Игри на престоли“ и „Педесет нијанси сиво“. Ние сме единствени во Скопје што го имаме комплетот на Џорџ Мартин од седум книги, кој чини 3.699 денари. Добро се продаваат и „Во добро и во зло“ од Метју Kвик, „Хобит“ и другите дела на Толкин. Стивен Kинг, Агата Kристи и Џон Гришам се продаваат постојано. Имаме одлична понуда на класици во издание на „Пингвин“, чија целна група се студенти и постдипломци на Филолошки факултет од кои триесетина наслови се трошат постојано - вели Лазески.
На интернет-страницата на „Kупикнига“ наменета за електронска продажба на книги има околу 650 книги на англиски јазик од повеќе светски издавачи како „Блумсбери“, „Фабер и Фабер“, „Нортон и компани“, „Хјутон Мифлин“. Таму се застапени и дела што ги продаваат „Икона“, „Академска книга“, „ПНВ публикации“. Меѓу распродадените изданија на интернет-страницата се биографијата на тренерот сер Алекс Фергусон, збирка од Шекспирови дела, како и комплет со седум дела на Џ. K. Роулинг за волшебникот Хари Потер, кој изнесува 4.499 денари.
Оригинали пред сè
Во книжарницата на „ПНВ публикации“ се продаваат класици во издание на англиски „Вордсворт“. За комплет од три книги, кој чини 500 денари, има голема побарувачка.
- Возрасната група читатели на книги на англиски јазик главно се на возраст од 15 до 40 години. Тоа се луѓе што го учеле јазикот, активно комуницираат и го користат, па претпочитаат делата да ги читаат во оригинал. Најчести читатели на дела на англиски јазик се сепак студентите од катедрата за англиски јазик и книжевност при Филолошки факултет - вели Јулијана Величковска, директорка на „ПНВ публикации“.
И Лазески вели дека луѓето претпочитаат оригинали без разлика дали се преведени на македонски или не.
- Секако, кој може да си дозволи. Ние работиме директно со странските издавачи и нашите цени се движат од 300 денари нагоре. Иако некои енциклопедиски изданија, кои кај нас чинат околу 2.000 денари, во одредени книжарници преведени на македонски јазик чинат многу поскапо - истакнува тој.
Извор: Дневник
Марина Лазаревска
