Вештини или диплома? Што повеќе сакаат работодавачите?
На растечкиот пазар на труд, каде бројот на дипломирани студенти, но и магистри и доктори е во постојан подем, работодавачите покрај академската позадина се повеќе се фокусираат на вештините кои ги поседуваат практикантите или идните вработени во нивните компании. Последните истражувања покажуваат дека во постојана нагорна линија е трендот меѓу светски познатите компании кои од кандидатите за работа бараат преговарачки вештини, вештини за брзо решавање на конфликти, за брзо донесување на важни одлуки...
Оттука одговорот на насловното прашање не е во
дилемата „или-или“ (вештини или диплома), туку сведочи за нова мода во
светскиот бизнис секторот во кој се почесто се бараат едуцирани
вработени, но притоа потковани со вештини (односно и образование и
вештини). Така, ако се верува на последните истражување, компаниите
сакат студенти кои не само што ќе дадат дополнителна вредност на
компанијата, туку ќе поседуваат и вештини преку кои ќе помогнат да ја
трансформираат организацијата со оглед на постојаниот и брзорастечки
економски и технолошки развој.
Доказ за ваквиот тренд се последните огласи за работа кои доаѓаат од
банкарскиот сектор, меѓу кои и од светски реномираните компании како
J.P. Morgan и Royal Bank of Scotland. Нивните огласи за работа станаа
вистинска медиумска атракција бидејќи преку истите бараа студенти од
хуманистичките науки и од областа на уметноста, наспороти студентите од
економските науки што барем досега беше воспоставена пракса.
„Повеќе банки се почесто сметаат дека студентите од овие насоки
поседуваат вештини и лесно можат да бидат обучени во областа како
трговија, за кои претходно предметите како математика беа одлучувачки
критериум“, анализираат светските медиуми. Компаниите пак со одговор:
„Нам ни се потребни комуникациски и вештини за презентација со цел да се
убедат луѓето да направат промена во начинот на размислување. Затоа
сметаме дека студентите од ваквите области поседуваат повеќе такви
вештини, отколку студентите на регуларните студии за економија“.
Меѓутоа ваквата нова мода не е карактеристична за банкарскиот секторот.
Праксата покажува дека компаниите во светот се повеќе се свртуваат кон
ангажирање на креативната група луѓе(уметници, дизајнери, иноватори)
отколку студентите кои имаат добро теоретско знаење, но немаат вештини
кои би донеле промени во компанијата.
Но, кои се вештините кои ги бараат компаниите? Според листата што ја
направи угледниот магазин, 10-те најбарани вештини во светски
реномираните компании се следниве:
1. Критично размислување – употреба на логиката за да се
идентификуваат јаките и слабите страни на алтернативните решенија,
заклучоци и пристапи за решавање на проблемите
2. Решавање на комплексни проблеми
3. Пресудување и носење одлуки- земајќи ги предвид негативните страни
и бенефициите од некоја акција да се избере најдоброто и најисплатливо
решение
4. Активно слушање- да се посвети вистинско внимание на тоа што
луѓето зборуваат, да се разберат поентите кои се направени за време на
дискусијата, да се поставуваат вистинските прашања, но и да се биде
учтив и да не се прекинува додека некој зборува
5. Компјутери и електроника- компјутерски вештини, процесирање,
вештини за електронска опрема и компјутерски хардвер како и вештини за
создавање апликации и програмирање
6. Математика- познавање на аритметиката, алгебрата, геометријата, статистика.
7. Системска анализа- анализа за тоа како системот работи или треба
да работи и како промената на условите, операциите и опкружувањето ќе
влијае на резултатот.
8. Мониторирање – набљудувањето на опкружувањето, на самиот себе, на
другите индивидуи или на целата организацијата и нивните реакции со цел
да се направи напредок во компанијата или да се коригира одредено
однесување
9. Програмирање
10. Продажба и маркетинг- познавање на принципите и методите за
покажување, промовирање и продавање на производите и услугите. Ова
вклучува и маркетинг стратегија и тактика, демонстрација на производите,
продажба на техниката.
Автор: М.А
Извор: Факултети
