Претседателот Иванов денеска оствари средба со Патријархот на Руската Православна Црква, г.г. Кирил

Кирил ќе помогне во канонскиот компромис меѓу Македонската и Српската Црква

Поглаварот на Руската православна црква г.г. Кирил на средбата со македонскиот претседател Ѓорге Иванов истакнал дека канонскиот статус на МПЦ е многу важен бидејќи ќе ги обезбеди македонскиот идентитет, јазик и култура

Патријархот на Руската православна црква г.г. Кирил денеска (9.02) на средба со претседателот на Република Македонија Ѓорге Иванов во неговата резиденција во Москва нагласи дека е подготвен да вложи напори за решавање на канонскиот статус на МПЦ-ОА.
Според г.г. Кирил, изнаоѓањето компромис може да доведе до решавање на ова прашање. „ Изнаоѓањето патишта за канонизација на МПЦ е многу важно во овој момент. Канонскиот статус на вашата црква е од голема важност затоа што ќе го обезбеди македонскиот идентитет, јазик и култура“, рече рускиот патријарх г.г. Кирил.
Тоа што е МПЦ надвор од семејството на канонските цркви, истакна тој, ја ослабува позицијата на МПЦ.
Рускиот патријарх позитивно ги оцени дваесетте години од воспоставувањето на дипломатските односи меѓу двете земји, потенцирајќи. меѓу другото. дека главен извор на заедничката историја се браќата просветители Кирил и Методиј. Рускиот патријарх спомена дека ќе биде подарен книжевен фонд на манастирот Трескавец.
Претседателот Иванов, упатувајќи му поздрав од архиепископот и свештенството на МПЦ-ОА, нагласи дека македонската црква е жива црква.
„Ние сме политичари со мандат, но црковните прашања немаат мандат. Тие се решаваат во долги периоди“, рече Иванов.
Тој потенцира дека сепак, како политичари, треба да создаваат амбиент да дојде до комуникации меѓу црквите и да поттикнат дијалогот за да се дојде до решение.
„Она што е христијанска доблест - трпението, треба да го имаат предвид и нашите верници, односно секој пат за црковните прашања постепено, преку дијалог и создавање доверба, да наоѓаат решение“, рече Иванов, изразувајќи надеж дека средбата со рускиот патријарх ќе биде во полза токму на тој воспоставен дијалог меѓу црквите за да се нудат решенија во корист на верниците.
Оценувајќи ја неговата втора средба со г.г. Кирил како многу конструктивна и содржајна, Иванов истакна дека рускиот патријарх, како и сите други христијани изразува загриженост за состојбите со христијанството и христијанските вредности, особено за она што се случува таму каде што се малцинство.