Деновиве излегоа од печат двата тома „Критички методи и толкувања“, издание на МАНУ кое произлезе од научноистражувачкиот проект „Методи на книжевната херменевтика“. Томовите се приредени од академик Катица Ќулавкова, а во нив се објавени текстови на 22 автори.
Во македонската книжевна наука досега немало ни изворни (македонски), ни преработени книги (зборници, хрестоматии), во коишто систематизирано се претставени систематизирани водечките критички и толкувачки методи. Во овие два тома се прикажани најзначајните критички методи на книжевноста (од дијалошката критика на Бахтин, структурализмот и семиотиката, до постструктурализмот и деконструктивизмот, теоријата на рецепцијата и критиката на читателскиот одговор, потем психоаналитичката, архетипската, ритуалистичката и интертекстуалната критика, постколонијализмот, синкретичкиот и интермедијалниот метод, новиот историцизмот, културолошките, наратолошките, театролошките и филмолошките стратегии, како и стрип-етстетиката. Секој прикажан метод е, во одделен оглед, проследен со оригинални толкувања на конкретни книжевни и уметнички дела на македонски и светски автори.
Како автори на текстовите се јавуваат, покрај К. Ќулавкова, и универзитетските професори: Иван Џепароски, Венко Андоновски, Јасна Котеска, Антоанела Петковска, Лидија Капушевска Дракулевска, Марија Ѓоргиева Димова, Ангелина Бановиќ Марковска, Мируше Хоџа, Владимир Мартиновски, Силвана Балнат, Бујар Хоџа, Вангел Ноневски, Ана Стојаноска, Калина Малеска, Соња Стојменска Елзесер, Анастасија Ѓурчинова, Нина Анастасова Шкрињариќ, Ана Кечан, Искра Тасевска, Кристина Димовска и Бошко Караџов.
Функцијата на оваа двотомна хрестоматија не е поврзана само со нејзиниот теориски карактер туку и со нејзината наставно-образовна функција. Поради тоа, ова издание е колку репрезентативно толку и корисно за македонската современа наука и култура.
Книгите можат да се набават во книжарницата на МАНУ.
Извор: МАНУ
