На 15 март 2001 година во Москва бил осветен домашен храм на Руското дворско општество, посветен на иконата на Божјата Мајка „Державнаја“ (од „держава“, руски – златна топка со крст, еден од симболите на царската власт).
Потомците на дворскиот ред на Русија паднале молитвено пред „Державнаја“ Богородица со голема надеж дека знаците на врховна власт – скиптарот и златната топка со крст, коишто Пречистата ги држи во Своите раце – по Божја милост одново ќе бидат врачени на законскиот државен поглавар кога ќе го отфрлиме безбожништвото не само надворешно, туку и од нашето срце, кога ќе се покаеме, ќе се очистиме од осквернетост и кога духовно одново ќе се соединиме со онаа голема, преславна земја којашто нашите предци ја создавале, укрепувале, украсувале и заштитувале.
Иконата на Божјата Мајка „Державнаја“се јавила на православниот народ на 2 март по стар стил (15 март по нов стил) 1917 година – во денот во кој императорот Николај II го оставил престолот и отишол во селото Коломенское, блиску до Москва. Небесната Царица на оваа Нејзина икона е претставена како земна Царица Којашто седи на царски трон, облечена во царска багреница, со знаци на царска власт: круна, скиптар и златна топка со крст во рацете. Оттука произлегува и името на иконата.
Историјата на нејзиното откривање е едноставна и прекрасна. Таинствен глас на сон í кажал на селанката Евдокија Андрианова од селцето Перерв, коешто се наоѓа точно наспроти Коломенское, на спротивниот брег на реката Москва:
- Во селото Коломенское има голема црна икона. Треба да се земе и да се направи да биде црвена. И нека се молат пред неа.
И на Евдокија í се прикажал прекрасен бел храм, а во него – прекрасна икона на Пречистата.
Селанката отишла во Коломенское и во црквата „Вознесение Господово“, устрелена угоре над брегот на реката Москва, веднаш го препознала белиот храм од сонот. Откако го ислушал расказот на Евдокија, старешината на храмот - отецот Николај Лихачов í ги покажал сите стари икони од храмовиот иконостас, но среде нив не се наоѓала иконата за којашто соопштил ноќниот глас. По долго барање во подрумот, одвај пронашле една стара црна штица. Штом ја измиле, пред вчудовидените сведоци светнал светлиот образ на Богородица. Во нејзиниот скут бил Младенецот Кој благословува, на нејзините рамена – багреница, чиниш напоена со маченичка крв, на главата – круна, украсена со дијамантските солзи на руските новомаченици.
Чудесното јавување на оваа икона точно за време на трагичните денови во пролет, 1917 година, не може да се протолкува поинаку освен како специјална милост на Пречистата кон руската земја. Небесната Покровителка привремено ги зела во рацете симболите на власта над Русија, отпаднати од рацете на законскиот државен поглавар.

Тропар, глас 4

Ангелските ликови со стравопочит Ти служат, и сите Небесни Сили со гласови коишто не замолкнуваат Те ублажуваат, Богородице Дево, усрдно Те молиме, Владичице: Божествената благодат да почива на чесната Твоја "Державнаја" икона и светозарниот зрак од Твојата слава и Твоите чудеса да ги огрева сите, коишто со вера Ти се молат и викаат кон Бога Алилуја.

Молитва

О, Застапнице за светот, Севоспевана Мајко! Како што паѓаме коленопреклоно со страв, вера и љубов пред Твојата "Державнаја" икона, усрдно Те молиме: не одвраќај го Твоето лице од оние коишто прибегнуваат кон Тебе. Измоли, милосрдна Мајко на Светлината, од Твојот Син и наш Бог, Преслаткиот Господ Исус Христос, да ја запази во мир нашата земја, да ја утврди нашата држава во спокој и да нî избави од меѓусебни расправии, да ја укрепи нашата Света Православна Црква и да ја запази од безверие, раскол и ереси. Бидејќи немаме друга помош, освен Тебе, Пречиста Дево; Ти си сесилна Застапница на христијаните пред Бога и го омекнуваш Неговиот справедлив гнев. Избави ги сите, коишто Ти се молат со вера, од гревовни паѓања, од подмолност на лошите луѓе, од глад, таги и болести. Подари ни дух на скрушеност, смирение на срцето, чистота на помислите, поправање на нашиот гревовен живот и прошка на нашите согрешенија, та сите, воспевајќи го со благодарност Твоето величие, да бидеме удостоени со Небесното Царство и таму заедно со сите светии да го прославиме пречесното и великолепно име на прославениот во Троица Бог, Отецот и Синот и Светиот Дух. Амин.

Подготви: Марија Влаќеска