На 23 и 24 јули во Москва се одржа Првиот меѓународен фестивал на социјални технологии за заштита на семејните вредности "За животот 2010". Фестивалот го организираа многубројни православни и непрофитни здруженија, на чело со Сојузот на православните граѓани на федералниот округ Поволожје и Серуската организација "За животот и заштитата на семејните вредности", со поддршка на Синодалниот оддел за црковна добротворност и општествено служење на Руската Православна Црква. Претседателот на Синодалниот оддел, архимандрит Пантелимон (Аркадиј Шатов), доаѓа на ова место по актуелниот патријарх Кирил. На прес-конференцијата и во воведното предавање тој говореше за потребата од забрана за убивање на сите неродени деца. Ако законот на некоја држава го поддржува убиството на неродените деца, рече тој, одговорноста, но и Божјата казна, освен  непосредните учесници во убиството, ќе ја сноси и народот во целост. Кога државен закон забранува да се убиваат неродените деца, тогаш одговорноста и казната Божја ќе ја сносат само оние што го прекршуваат тоа. Ова го пренесоа многу руски медиуми.
На Фестивалот присуствуваа повеќе од 300 учесници од Русија, Украина, Белорусија, Ерменија, Полска и Хрватска. Имаше обид да се обединат повеќегодишните искуства.
Истовремено се одвиваше и конгрес на истата тема. Посебно се говореше за штетноста и недопуштеноста на контрацепцијата, стерилизацијата, вештачкото оплодување, убивањето, како и за воспитанието - да не се почнува со сексуалниот живот пред и надвор од бракот кој Бог го благословува и кој е за цел живот.
Денес во многу земји, можеби веќе и во Русија, најголемиот број убиства на неродените деца се одвиваат без т.н. хируршки абортус, и тоа уште пред всадувањето на детето во матката, преку разни постапки поврзани со оплодувањето во епрувета и преку средствата со кои доаѓа до зачнување, но кои тогаш автоматски го убиваат детето во првите денови по зачетокот додека жената најчесто не ни забележува дека е трудна. Вака дејствуваат сите видови антибеби пилули, спирали, хормонски фластери, разни хормонски посткоитусни средства, имплантати итн.
Со рекламирањето презервативи ниту во една земја не запре ниту се намали процентот на заразените од АИДС или од некоја друга болест, зашто болестите се пренесуваат и преку презерватив. Меѓутоа, со рекламата на ова средство се поддржува предбрачниот и вонбрачниот сексуален живот кој е главната причина за зарази, а така се развива и негативен став кон бракот и родителството. Користејќи ги сите овие сознанија, Руската Православна Црква постигна големи успеси во борбата против неморалното воспитание во училиштата.
Државната власт исто така презема некакви чекори за демографско закрепнување. Повеќе години постои договор меѓу Руската Православна Црква и Министерството за здравство, според кој претставниците на Православната Црква имаат право да организираат разговори со трудниците во сите медицински установи за да ги одвратат од абортус. Оваа работа доведе до големи резултати и придонесе да се развие општествена атмосфера која е сé повеќе склона да го почитува животот на неродените деца и Божјиот дар на плодноста.
Натпреварувањето на фестивалот се одвиваше во повеќе дисциплини:
1. Работа со трудници што се во криза да се откажат од абортусот;
2. Спроведување правна заштита на традиционалните семејни вредности;
3. Општествена реклама;
4. Одржување предавања и изложби;
5. Воспитни програми;
6. Публикации за заштита на животот;
7. Уметничка дејност;
8. Работа со јавните гласила;
9. Дејствување на Црквата на ниво на парохии.

Посебно внимание привлече здружението чии претставници демонстрираа на улица, пред зградите во кои во разни градови се вршат абортуси. Облечени во бели мантили испрскани со црвена боја, зедоа в раце инструменти за абортус и црвено обоени делови од детски гумени кукли и глумеа гинеколошки персонал кој врши абортуси. Во текот на фестивалот неколкупати во живо ја демонстрираа својата дејност за заштита на неродените деца, а поставија и големи плакати кои го илустрираат тоа.
Беа објавени и податоци, добиени од јавно достапни извори, за тоа колку пари во последниве години им пратиле на своите соработници во одделни посткомунистички земји разни меѓународни противживотни установи кои се борат против раѓањето. Така непосредно се судрија со интересите на сите тие земји. Сега станува појасно кои се тие лица и здруженија кои ги поттикнуваат гревовите против животот на неродените деца, протв Божјиот дар на плодноста или кои на други начини се обидуваат да ја раскинат врската меѓу човечката сексуалност, бракот, зачнувањето и раѓањето, врската што ја предвидел Бог, создателот на човекот.
Ги издвојуваме податоците за некои од земјите-жртви.
Во Руската Федерација од 1992 до 2010 г. за поддршка на гревовите против раѓањето од странство се пратени повеќе од 331 милион долари, во Белорусија од 1994 до 2010 г. над 24 милиони, во Украина од 1994 до 2010 г. над 302 милиони долари, во Полска од 1991 до 2010 г. повеќе од 2 милиона долари, во Словенија од 1993 до 2010 г. 138 илјади долари, во Србија и Црна Гора од 2003 до 2010 г. над 18 милиони долари, во Босна и Херцеговина од 1993 до 2010 г. над 34 милиони долари, во Македонија од 2002 до 2010 над 18 милиони долари, а во Хрватска од 1994 до 2010 г., со прекини од 1998 до 2001, над 11 милиони долари.
Меѓутоа, милиот Бог е посилен од сите зла на светот! Треба цврсто да се потпреме врз Неговата заштита и да се надеваме дека сепак останале толку праведници кои се во состојба да им помогнат и на другите да се покаат и да живеат во согласност со Божјата волја, без оглед на многубројните прелести што нé опкружуваат. На тој начин ќе се гради цивилизација на љубовта, на животот и мирот, цивилизација во која е убаво да се живее и во која луѓето и народите меѓусебно ќе се почитуваат.

Dr. med. Антун Лисец
    
Превод од хрватски
Ирена Кепеска