Претседателот на Р. Македонија во посета на манастирот во Рајчица и на Бигорскиот манастир (04.03.2010)
Братството на Бигорската света обител и сестринството во Рајчица, денес ја имаа честта да го пречекаат во своите манастири, многупочитуваниот претседател на нашата држава, г. Ѓорге Иванов. Најпрво претседателот со голема љубов беше свечено примен од сестрите во Бигорскиот метох, посветен токму на светителот чие име го носи, и на свое големо задовоство, имаше можност да се поклони на моштите од Св Георгиј Победоносец, за кои тој истакна дека се од големо значење не само за манастирот туку и за целиот наш народ, бидејќи, според неговите зборови тие се „делче од светата десница која го победи злото”. Посетата продолжи во Бигорскиот свет манастир, каде на г. Иванов му беше приреден торжествен пречек, со доксологија – молитви кон нашиот милостив Господ Исус Христос за укрепување и духовно просветлување на нашата христољубива влада, како и молитви за самиот претседател, просејќи од Господа да го посети со својата благодат и да ја води неговата десница во достоинственото раководење со нашата татковина. Во оваа свечена пригода игуменот на Бигорскиот манастир, архимандрит Партениј, го израдува претседателот со еден навистина прекрасен подарок – зографисана икона со сребрен и позлатен оков од неговиот светител – заштитник, светиот Великомаченик Георгиј. Притоа о. Партениј му ги изрази својата голема почит и срдечни желби за успешно и пожртвувано раководење на државата во духот на христијанските морални начела.
Известуваат: сестрите од манастирот во Рајчица
