Скопје, 26 ноември 2009 г.(МИА) - „Блаженствата земнонебесни скалила“, „Вовед со Светото писмо на новиот завет“ и „Прво послание на Светиот апостол Павле до Коринтјаните“, се насловите на трите книги на проф.д-р Ратомир Грозданоски, протоѓакон, промовирани денеска во Соборниот архиепископски храм „Свети Климент Охридски“ во Скопје.
Проф.д-р Стефан Санџаковски, презвитер, и редовен професор на Православниот богословски факултет-Скопје во промотивната беседа за „Блаженствата земнонебесни скалила“ рече дека оваа книга ја посведочува наклонетоста на Грозданоски кон идеите на црковниот универзализам.
- Токму затоа таа претставува нов импулс за натамошниот развој на библиските науки кај нас. Проф.Грозданоски во деветте блаженства согледува девет божествени добродетели. Нивната реализација претставува судбоносен и радикален пресврт во човечкото сфаќање на животот. Токму овој нов критериум на животот и категоријален систем му треба на модерниот човек кој страда од ерозија на морал, истакна Санџаковски.
Проф.д-р Ѓоко Ѓорѓевски, вонреден професор на Православниот богословски факултет-Скопје во промотивната реч за „Вовед со Светото писмо на новиот завет“ истакна дека книгата е посветена на јубилејот 2000 години од раѓањето на свети апостол Павле, а нејзиното излегување се поврзува и со 50-годишнината од возобновувањето на Охридската архиепископија во лицето на Македонската православна црква.
- Според заклучоците на авторот сите книги од Новиот завет настанале во период од околу 50 години на просторот од Коринт до Ефес. Како место на пишување на новозаветните дела се спомнуваат Антиохија, Ефес, Коринт, па Македонија...Најголемиот број од делата односно половината новозаветни книги потекнуваат од апостолот Павле, а вториот по ред на авторство е светиот апостол и евангелистот Јован, кој напишал пет од сите новозаветни списи, рече Ѓорѓевски.
Промотивно слово за книгата „Прво послание на Светиот апостол Павле до Коринтјаните“ одржа проф.д-р Иван Желев Димитров, професор на Богословескиот факултет во Софија.
Свеченоста беше збогатена со духовни композиции на камерниот мешан црковен хор „Свети Климент Охридски“ од Скопје. рп/дма/15:30
###
