Скопје, 13 ноември 2009 г.(МИА) - Под мотото „Замисли ја Македонија во зелено“ денеска на 120 локации во 32 општини во Македонија  беа засадени 7,5 милиони садници на површина од 3.674 хектари во рамки на четвртата акција „Ден на дрвото - засади ја својата иднина“.

Претседателот на државата Ѓорге Иванов засади дрвце пред салата „Борис Трајковски“, а премиерот Никола Груевски и министерката за внатрешни работи Гордана Јанкулоска на Ајватовски Рид во атарот на селото Мршевци.

Премиерот Груевски смета дека акцијата е добра од повеќе аспекти меѓу кои заштита на животната средина, здравјето на луѓето и подигнувањето на свеста кај младите и нивниот однос кон природата. Тој изрази надеж дека акцијата ќе стане традиционална и оти од година во година Македонија ќе станува се позелена.

- Станавме пример во регионот и пошироко и почнаа да не следат и други држави. Цврсто верувам дека во иднина целиот Балкан, а можеби и пошироко ќе ја прифати оваа акција и ќе почнат да не следат и во овој дел, рече Груевски додавајќи дека додека е на функција масовно ќе ја поддржува акцијата.

Вицепремиерот и министер за финансии Зоран Ставрески засади дрвце во местото Рудине, во близина на селото Нова Брезница,  а вицепремиерот за економски прашања Владимир Пешевски на Ајватосвки рид во близина на селтото Ајватовци.

Министерот за правда Михајло Маневски и заменикот-премиер и министер за правда на Словачка Виера Петрикова засадија дрвца пред салата „Борис Трајковски“, а на различни локации низ државата дрвца засадија и вицепремиерот Абдулаќим Адеми во Дебар, министрите за образование и наука Никола Тодоров во Крива Паланка,  за транспорт и врски Миле Јанакиески во Охрид, за информатичко општество Иво Ивановски во месноста Билбил камен, Битолско. Дрвца засадија и градоначалниците од повеќе општини, пратеници, припадници на АРМ, ученици, невладини организации, компании, ....

Иницијаторот на акцијата операскиот пејач Борис Трајанов е задоволен од денешната акција и од излезноста на граѓаните. - Секаде имаме добри резултати. Во некои градови има помала излезеност, но затоа има насадени многу садници, рече Трајанов и додаде дека и овој пат Македонија покажала дека е соединета.

Директорот на „Македонски шуми“, Жарко Караџовски смета дека одѕивот е одличен и оти народот масовно учествува во акцијата. Тој информира дека најмногу се садат дрвца од сортите багрем, чемпрес и зимзелени дрвца кои опстануваат на овие простори.

За помасовно учество во акцијата Владата го прогласи денешниот ден за неработен, што ќе се одработи во сабота на 21 овој месец.

Во досегашните три акции беа засадени вкупно 13 милиони садници. Првата акција беше спроведена на 12 март 2008 година кога беа засадени два милиони дрва. По шест месеци, на 28 октомври 2008, беше организирана и втората со засадување шест милиони садници, а на 14 март 2009 беа засадени уште пет милиони дрвца.

Во првите две акции се зафатиле 57,5 отсто од садниците. Според проценката на шумарските експерти, секое пошумување со над 30 проценти зафатеност, се смета за успешно.

Во досегашните три акции излегле 450.000 граѓани, а се пошумени вкупно 5.080 хектари со црн и бел бор, смрека, ела, костен, јавор, јасен, даб и див костен. 

Организаторите планираат нова пролетна акција која ќе биде на балканско ниво, на која покрај Македонија ќе учествуваат и Албанија, Црна Гора, Бугарија, Романија, Хрватска, Босна и Херцеговина, Србија и Словенија. сс/бак/15:40