Маестро Зубин Мехта по 40 години повторно пред македонската публика

Скопје, 2 јуни (МИА) - Светски познатиот диригент, маестро Зубин Мехта вечерва по четири децении повторно ќе настапи пред македонската публика. Во рамките на програмата на 47-то издание на Фестивалот Охридско лето, со Израелската филхармонија на вечерашниот концерт во „Метрополис арената“ ќе настапат со изведба на дела од Бетовен, Равел и Дворжак, изјави маестро Мехта на денешната прес конференција пред настапот.

- Добро е што сум повторно овде по 40 години. Минатиот пат бев во 1967 година заедно со Филхармонијата на Лос Анѓелес, само неколку години по катастрофалниот земјотрес во Скопје. Од она што можев да видам синоќа, градот денес станал метропола, рече Мехта.

Диригентот кој има настапувано на сите светски сцени и со сите глобално реномирани оркестри, посочи дека вечерашниот репертоар е избран со цел да се покажат различните стилови на музика што ја негува оваа филхармонија.

Изборот да се претстават со Симфонијата број 9, „Од новиот свет“ на Антонин Дворжак, како што вели концерт - мајсторот Брус Венштајн, е и потврда дека за израелските музичари ова е прва посета на земјата.

Концерт мајсторот Јешуа Пастернак, осврнувајќи се на структуарта на оркестарот истакна дека се работи за комплетен филхармониски оркестар со 105 музичари. Тој посочи дека карактеристично за оркестарот е што работи по посебен т.н. самоуправувачки систем според кој музичарите го водат концертот - систем на работа што се применува единствено уште во Виенската филхармонија.

Директорот на фестивалот Охридско лето, Тони Симоновски и музичкиот селектор на програмата на фестивалот Гордана Јосифова - Неделковска, се согласни дека со овој грандиозен концерт се потврдува не само рејтингот на фестивалот, туку се збогатува и се искачува на поголеми височини културниот концертниот живот во Македонија.

Одговарајќи на новинарско прашање, дали постои можност да гостува на Македонскиот филхармониски оркестар односно на оркестарот при Македонската Опера и Балет, маестро Мехта рече дека во неговата згусната агенда приоритетно место има Изрелската филхармонија, каде е назначен за доживотен музички директор, потоа се ангажманите во Фирентиската опера и во Оперсаката куча во Валенсија, поради што тоа ќе биде тешко изводливо во блиска иднина. Тој рече дека не му се познати македонските реномирани музичари, но оти секогаш се залага за поддршката на младите таленти и музицирање на современите музички дела. Од репертоарот кој опфаќа 400 години музика од барокот до модерната класика, вели, не може да си дозволи да издвои посебни дела или автори, но вели би можел цела недела да ја диригира Бетовеновата „Хероика“.

Верувам дека 2,5 часа колку што ќе трае концертот ќе има мир и не сум само јас кој што придонесува за тој мир. Но, фактот дека низ целиот свет дневно се одржуваат десетици илјади концерти навистина е извонредно кога тој мир од 2,5 часа го има се повеќе и повеќе. Замислиете си како би било без тие два часа. Тоа е еден здрав феномен. Сигурен сум дека на јавноста во Израел каде изведуваме седум концерти неделно им се потребни, вели маестро Зубин Мехта за тоа која ќе биде неговата главна порака од вечерашниот концерт уверен дека музиката е таа која ги зближува луѓето.

Концертот е поддржан од Министерството за култура. ва/нс/14:13