Воскресение Христово (Светол Понеделник)

На Воскресение Христово – втор ден (6.05.2013 г.), Неговото Преосвештенство епископот Лешочки г. д-р Јосиф, служеше Света Златоустова Литургија во манастирот на свети Ѓорѓи во с. Дељадровце. На Светата Литургија, верниот народ се причести со Светите Христови Тајни.

Во името на Отецот и Синот и Светиот Дух.
V.Josif.Leshok.jpg
Бога, никој никогаш не Го видел; Единородниот Син, кој што е во крилотo на Отецот, Тој Го објави.

Ова се зборовите со кои што крстителот Господов го проповедаше доаѓањето Христово во светот. Радоста на Израилот беше голема кога Ветениот Месија дојде меѓу своите, но таа радост не траеше долго, наместо небесно народот очекуваше земно царство, наместо вечно блаженство народот очекуваше моментално задоволување на желбите. Спасителот на светот беше распнат од оние за кои што дојде да ги спаси од ропството на гревот, беше распнат и убиен, и како мртовец беше положен во гроб.

Но, возљубени го Господа, само три денови после погребението Христово, Тој им се јави на неговите ученици во полна слава и таа радост никој и никогаш повеќе не може да им ја одземе. Таа радост им дава моќ и сила на учениците Христови, да можат да го проповедаат словото Божјо меѓу безбројните непријатели и да можат да ги издржуваат страшните мачења на мачителите. Радоста на учениците Христови е толку голема, зашто со свои очи го видоа Божественото лице Господово, лице кое само пред три дена беше покриено со завесата на смртта. Радоста на учениците е толку голема, зашто со свои уши ги чуjа зборовите на Спасителот се сврши, а само по три дена Тој повторно им вели Радувајте се. Радоста на учениците е толку голема, зашто пречистото тело Господово, кое што пред три дена со свои раце го погребаа, сега го гледаат пред нив како поминува преку заклучена врата.

Затоа и ние, драги браќа и сестри сме радосни, зашто нашиот Господ Исус Христос секојдневно ни се дава во Црквата, со очи Го гледаме, со уши ги слушаме Неговите спасителни зборови и на секоја света Литургија се соединуваме со Него, не привидно туку реално.

Да се радуваме и да се веселиме во овој ден, зашто овој ден е вечен празник на вистинската радост и веселие за сите времиња и за сите народи кои веруваат во Господа Исуса Христа. Овој ден го создаде Господ, за да се зарадуваме и да се развеселиме во него, зашто овој празник е плод на неограничената љубов на нашиот Бог, кој благоизволи да го спаси родот човечки од претешкиот јарем на гревот.

Возљубени во Господа!

Денес со нас се радуваат и апостолите, се радуваат и жените мироносици. И како што тие итаа кон Гробот Христов, кога ја слушнаат веста за Неговото воскресение, со таква радост и ние да итаме кон храмовите. Со радост да се поклониме пред иконите и крстот Господов и со радост да запееме, Христос воскресна од мртвите, со смртта смртта ја победи и на оние во гробовите живот им подари. Оваа радост на воскресението, да ја пренесуваме едни на други и едни со други да се поздравуваме со радосниот поздрав Христос воскресна – вистина воскресна.

А Бог на мирот и љубовта, кој што воскресна од мртвите, да не чува и да ни помага во секое добро дело, за да твориме дела што Него му се угодни, на Когo му прилега сета слава чест и поклонение во сите векови. Амин.

Христос Воскресна!