04.05.2013 Велика Сабота, храм Св. Никола - Аеродром
ХРИСТОС ВОСКРЕСЕ! ДА СЕ РАДУВАМЕ И ДА СЕ ВЕСЕЛИМЕ ВО НЕГО!
На Велика сабота, во Параклисот посветен на Св. Николај Чудотворец во Аеродром, верниот народ дојде да присуствува и сите заедно со радост да го дочекаме и прославиме Воскресението Христово.
После трикружниот опход околу храмот, о. Бобан Митевски го поздрави насобраниот народ со објавата ХРИСТОС ВОСКРЕСЕ, а благоверниот народ со радост воскликнуваше, НАВИСТИНА ВОСКРЕСЕ. Се зарадува небото и земјата, се осветлија душите наши! Бог не удостои и оваа година да го дочекаме и прославиме најголемиот Христијански празник - Воскресение Христово. Стоејќи пред храмот насобраниот народ, духовно гладен, се наситуваше со проповедта и поучувањто на отецот, кој велеше: И Исус Христос нашиот Бог, кружи постојано околу нашите срца, оладени и заслепени од овосветовниот живот, и како долготрпелив човекољубец чека да ги отвориме вратите. да ги воскреснеме во Него нашите срца и да ги исполниме со лјубов онака како што ни доликува, како вистински православни христијани. Да го живееме воскресението постојано, да го посетуваме Божјиот дом, не само на празниците туку редовно, особено на неделните Богослужби.
Ноќта беше отслужена Света празнична утрена и Литургија, каде верниот народ се причести со Светите Христови Тајни и беше прочитано Пасхалното слово на светиот отец нас Јован Златоуст, Архиепископ Константиноплоски.
“...Затоа, влезете сите верни во радоста на својот Господ; и првите и другите плата примете; богати и сиромаси, еден со друг ликувајте; кои се воздржувавте, кои сте биле мрзливи, почитувајте го денот; вие кои постевте и кои не постевте, веселете се денес! Трпезата е преполна, сите насладувајте се богато! Телето е угоено, никој нека не излезе гладен, сите насладете се со гозбата на верата, уживајте во богатството на добрината! Никој нека не ја оплакува сиромаштијата, зашто се јави општо царство. Никој нека не тагува заради гревовите, зашто прошка заблеска од гробот. Никој нека не се бои од смртта, зашто смртта на Спасителот нè ослободи, ја изгасна Оној Кого таа Го држеше, го заплени адот Оној Кој слезе во него, се огорчи адот вкусувајќи го Телото Негово. “
На крајот од оваа Свечена Богослужба, околу 3 часот, со Поздравното слово на Архиепископот Охридски и Македонски г.г. Стефан заедно со членовите на Светиот Архиерејски Синод, упатен до свестенослужителите, монаството и до сите чеда на Македонската Православна Црква и со Благословот Божји секој православен христијанин излегувајки од храмот, ја понесе радоста за чествуванјето на овој Празник над празниците!
† Христос Воскресна - Навистина Воскресна! † Хрїстóсъ воскрéсе - Воистину воскресе! † Χριστός ἀνέστη - Ἀληθῶς ανέστη! † Цхристус ресурреџит - Ресурреџит вере! †
За Преминпортал: Д.Б
