за секој час во денот и ноќта

 5 час

Дево Владетлке, Мајко на мојот Господ Исус Христос, знам дека сум нечист, осквернет, недостоен, затоа што беззаконијата ја надминаа мерата, станаа понеизбројни и од морскиот песок. Кон тебе прибегнувам принесувајќи покајание и исповедајќи ги своите гревови. Прости ми, Владетелке; помилувај ме Ти Која сите ги милуваш човекољубиво; не одвраќај го лицето свое од мене, за да не бидам јас ништожниот отфрлен од Тебе! Нека не се израдуваат на тоа моите непријатели. Поттикни ја мојата мисла кон покајание и раководи ме на патот на спасението. Чекорејки по него, дај ми Тебе да те имам за сопатничка, за да се спасам преку Твојата помош.
Владетелке, Мајко на човекољубивиот Бог, смири го моето срце и исполни го со скрушеност; дарувај им солзи на очите мои и просвети ги со светлината на молитвите Твои. Пороси ме и очисти ме со исопот на Твоето милосрдие; по благодатта Твоја изми ме со солзите мои. О, Мајко на Господа мојот Исуса Христа, прими ја мојава смирена исповест и молбата моја; во времето на исходот на мојата душа од телото милостиво на мене погледни, ослободи ме од бездушните мачители, биди ми заштитничка и уништи ја обврзницата на моите гревови. Приведи ме спасен кон престолот на Синот Твој и беспочетниот Отец Негов и Сесветиот Дух, светлозарната и единосуштната Троица, Кому Му доликува секоја чест и поклонување низ сите векови. Амин.

6 час

   Дево Владетелке, Пречиста Богородице, сеславна Госпоѓо моја, Ти повозвишена од небото, почиста од сончевата светлина, почесна од херувимите, пославна од војските небесни; Ти си пофалба на апостолите, проповед на мачениците, радост на преподобните, светлење на подвижниците, златна кадилница, светлозарен светилник, вистински кивот, божествен закон, несогорлива капина, процветан жезол Аронов! Ти навистина си станала жезол, а Синот Твој Христос, Богот и Творецот мој, е вистински Цвет. Ти по тело си го родила Бога Словото, и пред раѓањето и по раѓањето си останала Дева. Преку Тебе ние се помиривме со Бога Отецот преку Христа, Синот Твој. Ти си помошничка на грешните и беспомошните, утеха на светот, заштита на сирачињата, откуп од ропството, потпора на монасите, надеж на мирјаните, Ти си трпение, заштита, и заклон на вдовиците, пофалба, радост и венец на девојките. Славна Владетелке и Госпоѓо, сокриј ме и сочувај ме, за да не ме поруга лукавиот враг.
 Себеспрекорна, Ти си помош моја, и јас не знам друга закрила освен Тебе. Со солзи Те преколнувам, Владетелке, да не ме осуди Синот Твој и Творецот мој на вечни маки поради мноштвото мои гревови кои ги сторив. Те молам заземи се за мене, за да можам и јас да влезам во живеалиштето на светите, каде што нема ниту солза, ниту тага, ни смрт, ни мака, туку е непрекратлива радост, уживање на праведните, бесконечен живот, утеха и слава. Исполни ја мојата уста со Твојата благодат; побуди го мојот јазик со радосна душа и пламено срце да Те славослови; дај ми сила да го произнесам оној ангелски славопој, кој Тебе Ти го изговори Гавриил Архистртигот.
 Удостој го Дево, Твојот смирен слуга да се избави од страстите и гревовите; развеј ги мислите кои доаѓаат од ѓаволот и кои тој затоа ги праќа за да ја урниса мојата душа во крајна темнина. Дарувај ми, Дево, страв Божји и љубов; даруј ми живот беспрекорен; љубов кон Бога и ближните, трпение, воздржание, солзи, помислување на вечните маки и одврќање од злите дела, за да се удостојам да влезам во дворовите на Синот Твој и Бог, и таму со сите светии да го славам величенственото име на Пресвета Троица, низ сите  векови. Амин.

7 час

Дево Владетелке Богородице, општо спасение на родот христијански! Како Мајка, Ти непрестајно се грижиш за нас; жалостива, Ти нé опкружуваш со своите доброчинства, спасувајќи, чувајќи, избавувајќи од опасности, штитејќи од искушенија, ослободувајќи од гревови. Ние Ти благодариме за тоа, и не таејќи ги Твоите доброчинства ги опеваме Твоите чудни дела, ја прославуваме сомилоста, го величаме промислувањето, го славословиме посредувањето и спомнувајќи си од какви опасности си не избавила со своите заложби ние Ти принесуваме благодарна песна, која сепак е недостојна на Твоите големи доброчинства. Бидејќи што може да им биде ним достојно? Сепак Те преколнуваме: сожали се на Твоите служители и принеси за нас молба пред родениот од Тебе Бог наш, за Он да не избави од вечните маки.
Ти гледаш, Сесвета Владетелке Богородице, со какви беди нé опколува лукавиот демон. Тој ни ја дошепнува желбата да се оддаваме на страстите. Поради што Ти го одвраќаш лицето свое? Скини ги замките на лукавиот, истреби ги нашите непријатели,  со своето застaпништво сопри го гневот Божји. На своите доброчинства додади го уште ова на наша молба, и ние ќе го прославиме сесветото име на Синот Твој и Бога нашиот заедно со беспочетниот Негов Отец и животворниот Дух, сега, секогаш и низ сите векови. Амин.

8 час

Владетелке, Ти си ми од Бога дарувна утеха, божествно оросување на мојата внатрешна жега, нов вруток во пресушениот извор на солзите мои, светлозарен оган на мојата помрачена душа, раководство на мојот пат, покривање на мојата голотија, сопирање на моите лелекања, олеснување на невољите, уништување на оковите. Слушни ги молбите мои, и допрена од мојот плач, сожали се на мене. Пресретлива биди кон мојата молитва, исполни ја мојaта незаситна желба, ослободи ме од силовитата страст кој и ден и ноќ војува против мене и ја убива мојата душа; избави ме од стрелите на Велијар и од непријателите видливи и невидливи; со Твоето завземање удостој ме да се вбројам помеѓу преведните и преподобните и приброј ме кон слугите и служителите Твои во небесното обиталиште, во земјата на живите. Те преколнувам, општа заштито на сите, општа радост на сите, удостој ме да се израдувам со неизразливата радост на Синот Твој и Цар во Неговото безгранично царство. Дарувај ми да влезам во Неговите дворови и таму да го прославам Оној Кому Му доликува секоја чест и поклонување, сега, секогаш и низ сите векови. Амин

9 час

Дево Владетелке, Богородице, Мајко на Христа Бога нашиот, биди им сопатничка на оние кои патуваат и закрилувај ги; спаси ги заробениците од тешкото ропство; утеши ги ојадените; олесни секакво телесно страдање, и ослободи нé од  душевните немоќи и страсти со Твоите невидливи молитви, за да можеме откако ќе го завршиме патот на овој времен живот, преку Тебе да ги добиеме вечните блага во Царствово Небесно.
Правоверните власти* наши кои, Пресвета Владетелке, се надеваат во Твојата милост и посредување, укрепи ги против нивните непријатели; растури го облакот на тагата кој ги покрил нивните души; избави ги од зачмаеност и малодушност, и подај им светло и радосно расположение на духот, подарувајќи мир  и спокојство на државата нивна.
Со молитвите Твои, Владетелкe, спаси ја Твојата посветена паства, сиот град и земјата - од глад, земјотрес, поплава, пожар, колеж, наезда на туѓинци, меѓусебни војни; и праведниот гнев Божји одврати го од нас со благоволението и благодатта на Единородниот Син и Бог Твој, Кому Му доликува, секоја слава, чест и поклонување, со беспочетниот Отец Негов, и со Пресветиот и животоврорниот Дух, сега, и секогаш и низ сите векови. Амин.

*цареви (во оригиналот)

10 час

Дево Владетелке, благодатна Богородителко преблагословена, Богоблагодатна, сместиште на Божеството: на Единородниот Син Бесмртен и невидливиот Отец, приклони го увото Твое и слушни ги зборовите кои ги изговара поганата и нечиста уста моја. Со скрушено срце и смирени мисли прибегнувам јас кон милосрдието Твое. Не ме оставај презрен мене јадниот; не допуштај да пропаднам јас, недостојниот слуга Твој; исцели ја мојата бедна душа, обземена од лукави страсти: врагот ја сотре, рушејќи ја со гревовите на сластољубието..... Горко ми е и срамно, и јас не смеам од човекољубивиот Бог мој да искам простување за мноштвото мои гревови и исцелување на моите неицеливи рани. Го осквернив телесниот храм, со непристојни желби го осквернив, и со недопустливи постапки ги повредив сите мои чувства. Затоа не се осмелувам да ги подигнам рацете кон Него, извалкани со зли дела. И јас на молитва уста сум отворил, опоганета со напаѓање и клеветање на ближниот. Затоа и јас јадниот и заблудениот се фрлам себеси во прашина пред милосрдието Твое. Мене ми нема друга надеж, ми нема друго прибежиште освен Тебе, единствена утехо моја, избавување од тагата, откупување од ропството, обожение на смртните, препород на паднатите, обновување на мојата душа и тело, светлозарен светилнику на помрачената душа моја, покривање на голотијата моја, прекину на моите ридања, промено на мојата судбина. Во Тебе е сета надеж: не нé лишувај од Твоето посредување, туку помагај и закрилувај не! Твоите молби се пријатни на Твојот Син, бидејќи Оној Кој благоизволел да земе на себе обличје на слуга, изобилува со милоста Своја кон Тебе која Му послужи на неискажлив начин. Он се радува на посредувањата Твои, и сметајќи ја славата Твоја за Своја сопствена, Он радо им излегува во пресрет.
Пресвета Богородице, не ме оставај презрен мене оскрбениот, и грдоста на моите постапки нека не послужи за сопирање на Твојата милост. Помош посилна од Твојата неикаде не гледам, и крив за многу согрешенија јас со покајание прибегнувам кон Тебе, брзата помошничка во невољите, и од длабочините на срцето извикувам: смилувај се на мене мрзливиот и немарниот, прими ја мојата ништожна молба и со Твоите молитви одброволи Го кон мене Синот Твој и Бог, и удостој ме со удел во Небесното Царство мене кој го славословам Едниот во Троица Бога, сега, секогаш и во сите векови. Амин.

Подготви : Маја Белева

Свети Ефрем Сирин - Молитви кон Пресвета Богородица

Посети:{moshits}