Св. Макариј Велики

БЕСЕДА 34

За славата на христијаните, со која при воскресението ќе се удостојат нивните тела, кои ќе се просветат заедно со душите.

Pokajanie5..jpg 1. Како што телесните очи гледаат јасно, така и на душите на светите им се јасни и видливи убавините на Божеството, со кои се слеваат и кои се во умот на христијаните. Славата, скриена од телесните очи, јасно и се открива на верната душа, која била умртвена од гревот, и Господ ја воскреснува, како што ги воскреснува мртвите тела, подготвувајќи и ново небо, нова земја и сонце на правдата, давајќи и се од Своето Божество. Постои вистински свет, и земја на живите, и плодородно лозје, и леб на животот, и вода жива, како што е напишано: „Верувам, дека ќе ја видам Господовата благост во земјата на живите" (Псал. 26,13); и уште: „А за вас, кои се боите од името Мое, ќе изгрее сонцето на правдата, и исцеление ќе има во зраците негови" (Малах.4,2). И Господ рекол: „Јас сум вистинска лоза" (Јован 15,1); и уште: „Јас сум лебот на животот" (Јован 6, 35); и уште: „Кој пие од водата, што ќе му ја дадам Јас, нема никогаш да ожедни; таа во него ќе стане извор на вода, што ќе тече во живот вечен" (Јован 4, 14).
2. Доаѓањето Господово во целост било заради човекот, кој лежел мртов во гробот на темнината, гревот, нечистиот дух и лукавите сили, за Господ сега, во овој век, да го воскресне и оживотвори овој човек, да го исчисти од црнилото, да го просвети со Својата светлина и да го облече во Своите небесни одежди на Божеството. А при воскреснувањето на телата, чиишто души претходно воскреснале и се прославиле, ке се прослават и овие тела и ќе се просветат преку душата, којашто уште сега е просветена и прославена. Зашто за нив Господ е и дом, и скинија, и град. Ќе се облечат во неракотворено, небесно живеалиште, во славата на божествената светлина, бидејќи станале чеда на светлината. Едно на друго нема да гледаат со лукаво око, затоа што лукавството ќе биде одземено. „Нема" таму „ни роб, ни слободен; нема машки пол, ни женски" (Гал. 3, 28), затоа што сите се променуваат во божествената природа, стануваат добри, богови и чеда Божји. Таму братот на сестрата ќе и искаже мир, затоа што се е едно преку Христа, и сите се успокојуваат во истата светлина. Ке бидат внимателни еден кон друг, и штом едниот почнува да го слуша другиот, во истиот час се озаруваат од вистината, од вистинското спознавање на неискажливата светлина.
3. Така ќе се видат еден друг во многу обличја, и во многу и најразлични божествени слави, и секој ќе се восхити и ќе се израдува со неискажлива радост, гледајќи ја славата на другиот. Гледаш колку се неизразливи и недостижни Божјите слави - затоа што тие се неискажлива светлина, вечни тајни, непребројни богатства. Зашто како што во видливиот свет никој не може да ги изброи сите најразновидни растенија, семиња и цветови на земјата, и никој не е во состојба да го измери или познае целото земно богатство; како што ниеден човек не може да ги опфати со умот сите живи битија во морето или нивниот број, породот, разликите, или количеството на водата, или пространството на морето; како што е невозможно да се дознае бројот на птиците во воздухот, или нивниот пород, или разнообразноста; како што не е можно да се сфати големината на небото, положбата на ѕвездите или нивното движење: исто така невозможно е да се изрази или опише неизмерното, безгранично и недостижно богатство на христијаните. Зашто, ако овие нешта се толку неопфатни и недостижни за луѓето, тогаш колку е понедостижен Оној Кој ги создал и подготвил? Според тоа, човекот, пред се, треба да се радува и весели што на христијаните им е подготвено такво богатство и наследство, кое никој не е во состојба да го изрази или опише. Сесрдно и смиреномудрено треба да се пристапи кон христијанскиот подвиг и да се прими она богатство, затоа што наследство и дел на христијаните е самиот Бог. Зашто, речено е: „Господ е дел на моето наследство и од чашата моја" (Псал. 15,5). Во вековите слава на Оној Кој се дава Самиот Себе и Својата света природа ја соединува со христијанските души! Амин.