Кога станува збор за менталитетот на сопствените граѓани, Бугарија и Македонија се две многу слични балкански земји. Тоа е надалеку прочуениот балкански закоравен генотип на мачоизмот, каде што институциите на системот сè уште не можат до крај да ги преземат работите во свои раце. Овде не навлегувам во етичките импликации што се појавуваат како последица од механичката европеизација на тазе членките или на земјите изморени кандидати за членство. Иако Бугарија неодамна стана членка на ЕУ, минатата година беше казнета заради неправилно користење на средствата од т.н. европски пристапни фондови. Причината се вика корупција. Во Македонија ситуацијата на тој план е уште полоша, бидејќи нашиот влез во Унијата е дополнително искомплициран, заради проблемот со името. Овој феномен настана како последица од стравот на Грција дека ако влеземе во ЕУ ќе мора да плати најмалку 4000 милијарди евра како отштета за настраданите Македонци во нејзината граѓанска војна во 1948-мата година. Причината и тука се вика корупција. Само сакам да потсетам на една сериозна болест од која се зафатени нашите општества, а чијашто дијагноза ние сè уште одбиваме да ја прифатиме.

Кога во тажниот охридски настан од петти септември 2009г., ја бараме причината за несреќата, не е исправно (од православен аспект) да ја најдеме во Бог-а, што значи дека тезата пасторката на царот Ирод може да го принуди Бог да казни 15 невини луѓе, коишто наместо да одат на концертот, тргнале на една наивна пикторескна екскурзија, за мене е неодржлива.

Ставајќи ја Мадона на обвинителната клупа, со тоа посредно го осудуваме Христос, признавајќи дека несреќата била казна Божја. Според мене, тоа е догматски неисправно, бидејќи најгрубо речено, па дури и со јазикот на материјализмот, ако Бог е Љубов (св. Јован Богослов), Тој, дури и да казнува, неговата казна не може да биде смртта на луѓето. Ако се согласите со ова, причината за несреќата ќе ја барате во:
- лошата организација на екскурзијата (од бг страна)
- претовареноста на бродот и неговата дотраеност (од мк страна)
- немањето соодветна инфраструктура за потребите на туризмот (од двете страни)

Генезата е многу подлабока и поширока.
Во најмала рака, не е доволно да се рече дека зад толку лесно пронајдениот виновник за злосреќната охридска екскурзија стои обичното човечко лицемерие, коешто секогаш вината за казните што ги снаоѓаат другите му ги импутира на некој трет.

Ако вистински и искрено сакаме да лоцираме одговорност, прстот на „осудата“ ќе биде насочен кон нас самите. Нашето лично покајание е единствениот соодветен одговор на бесконечната Љубов Божја, којашто светот не ја позна, ја осуди и ја распна. Јас сум дел од тој свет. Моите гласни размислувања се само еден обид за приклонување кон логиката на љубовта, којашто е посилна од стравот. Кој се плаши, подобро нека не мисли...

Сестра Макрина

Друго:

Сестра Макрина - Време е за нов Илинден   

Посети: {moshits}