Скопје, 23 октомври (МИА) - Република Македонија денеска првпат го одбележува 23 Октомври - Денот на Македонската револуционерна борба.
По тој повод во Собранието на Република Македонија беше врачена државната награда „23 Октомври“ за долгогодишни остварувања во областа на науката, културата, образованието, заштитата на државните интереси и промоција на државните приоритети, вредности и културно-историско наследство на Република Македонија.
За остварување во областа на науката и образованието добитници се д-р Танас Вражиновски - етнолог и проф. д-р Тахир Зајази методичар, и академикот Гане Тодоровски е награден за остварување во областа на културата.
Во Македонската Опера и Балет вечер ќе се одржи Свечена академија на која свои обраќања ќе имаат претседателот на Владата Никола Груевски и претседателот на Македонската академија на науките и уметностите (МАНУ) академик Цветан Грозданов.
По нивните обраќања заеднички концерт ќе одржат Македонската Опера и Балет (МОБ) и Македонската филхармонија со дела на Џузепе Верди, Јоханес Брамс, Петар Илич Чајковски, Жорж Бизе, Арам Хачатуријан, Џакомо Пучини и Карл Орф.
Со оркестарот ќе диригира Борјан Цанев, а ќе настапат македонските оперски уметници -баритонот Горан Начевски, сопранистката Сандра Митровска, тенорот Ѓорѓи Цуцковски и мецосопранистката Ирена Кавкалевска.
На 23 октомври 1893 година во куќата на Иван Хаџи Николов во Солун, Христо Татарчев, Даме Груев, Петар Поп Арсов, Антон Димитров и Хрсто Ботанџиев го формираа Македонскиот револуционерен комитет од кој подоцна произлезе Внатрешно Македонската Револуцонерна Организација (ВМРО) или Внатрешно Македонско-Одринска Револуционерна Организација (ВМОРО). Организацијата се бореше за ослободување на Македонија со сопствени сили, без помош од надвор. Формирањето на ВМРО значеше почеток на организираното македонско револуционерно движење кое преку Илинден 1903 и Крушевската република, преку НОВ резултира со создавање модерна самостојна македонска држава.
Врачена државната награда „23 Октомври“
Скопје, 23 октомври (МИА) - Република Македонија денеска првпат го одбележува 23 Октомври - Денот на Македонската револуционерна борба и по тој повод во Свечената сала на Собранието денеска е доделена државната награда „23 Октомври“ за долгогодишни остварувања во областа на науката, културата, образованието, заштитата на државните интереси и промоција на државните приоритети, вредности и културно-историско наследство на Република Македонија.
За остварување во областа на науката и образованието добитници на годинашната награда се д-р Танас Вражиновски - етнолог и проф. д-р Тахир Зајази методичар, и академикот Гане Тодоровски е награден за остварување во областа на културата. Наградата на добитниците им ја врачи претседателот на Одборот за доделување на Наградата, Томе Бошевски.
- Доделувањето на државната награда „23 Октомври“ е свечен чин на чествување на Денот на основањето на Македонската револуционерна организација. Ако не се случеше 23 октомври 1893 година немаше да биде Илинден. Ако не се случеше Илинден 1903 немаше да биде 11 октомври 1941 година. Тоа се три светли датуми на македонската револуционерна борба кои го одбележаа векот на обнова на македонската државност извојувана со стотици илјади жртви, со повеќе стотици илјади раселени лица и со страшната голгота на македонскиот народ, рече Бошевски.
Д-р Танас Вражиновски истакна дека добивањето награда претставува висока чест и признание, но оти доделувањето на највисокото државно признание на Република Македонија за долгогодишно остварување во повеќе области од општествениот живот, а посебно од областа на науката, културата и образованието носи други повисоки димензии и тоа од професионална, државна и национална природа.
- Со оваа награда се валоризираат нашите достигнувања од еден долг период од нашиот животен век целосно посветен на развојот на нашата наука, образование и култура, рече Вражиновски.
На доделувањето на наградата присуствуваа претседателот на Собранието на Република Македонија Љибиша Георгиевски, премиерот Никола Груевски, поглаварот на Македонската православна црква г.г. Стефан, академици, министри, пратеници, научни работници, како и други претставници на политичкиот и општествениот живот.
Д-р Танас Вражиновски (1941) својот работен век го посветил на проучување на македонскиот фолклор и македонската етнографија и е меѓу водечките имиња во македонската фолклористика и етнологија. Автор е на монографиите „Илинденски прозен револуционерен фолклор“, „Македонски историски преданија“, „Народна демонологија на Македонците“, „Народна митологија на Македонците“, „Македонска народна Библија“, како и на повеќе трудови за македонското иселеништво. Неговите истражувања се забележани и од странската научна јавност, зашто објавил трудови во повеќе европски земји кои се цитирани во значајни енциклопедиски изданија. Бил поканет како визитинг-професор на неколку универзитети во Полска.
Проф. д-р Тахир Зајази (1936) својата педагошко-методичарска дејност ја извршува на Факултетот за педагошка и методолошка квалификација на Универзитетот на Југоисточна Европа во Тетово, каде што предава методика на предавање и учење. Завршил Учителска школа во Скопје, а по дипломирањето на Филозофскиот факултет, група Педагогија, работел како професор во повеќе средни училишта. Има објавено девет научни трудови, учествувал на повеќе меѓународни научни симпозиуми во земјава и странство. Сооработува во повеќе стручни списанија од својата област.
Академик Гане Тодоровски (1929) е афирмиран македонски писател, долгогодишен професор на Филолошкиот факултет во Скопје, учебникар, редактор на многу публикации, поранешен амбасадор на Република Македонија во Руската Федерација, член на Македонската академија на науките и уметностите, Друштвото на писателите на Македонија, ПЕН-Центарот, почесен член на сојузите на бугарски и на руските писатели. Оваа година „Матица македонска“ ги објави неговите Избрани дела во десет тома. Тодоровски е водечко име во повеќе полиња на науката и културата, како поет, критичар, преведувач, полемичар, книжевен историчар, а негови творби се објавени во светски антологиски изданија. рп/ми/14:20
Посети: {moshits}
