Во четврток, 2 јули 2009, во црквата на св.Параскева од Чикаго, беше отслужена Света Божествена Литургија во чест на големиот чудотворец светиот Јован Шангајски и Санфранциски. Чест ни е што овој прекрасен светител има своевремено служено на тлото на нашата црква Св.Петка! Тоа е случено во 60-тите години на изминатиот век, кога, пред да биде купена од нашите верници, нашата Црква била катедрална црква на Руската Православна Задгранична Црква. Среќни сме што Бог не удостоил да наследиме такво свето место, таква света Црква во која служел и принесувал молитви кон Бога самиот СВЕТИТЕЛ – прекрасниот Јован Шангајски! А неговата благодат во храмот сеуште се чувствува и знаеме дека неговите молитви за нас не престануваат!
Тропар кон Свети Јован Шангајски, гл.5
Грижата што ја пројави за твоето стадо во неговите страдања беше
праобраз на молитвите што постојано ги принесуваш за целиот свет. Затоа, веруваме, спознавајќи ја твојата љубов, о, светителу и чудотворче Јоване! Целосно осветен од Бога преку свештенослужењето на Пречистите Тајни, а и самиот со нив закрепнуван, ти им помагаше на оние што патат, о, пресветол исцелителу. Поитај ни напомош сега и нам, кои те почитуваме со сето срце.
Друг Тропар, гл.1
Дарот на светителството си го преумножил, на апостолите со проповедањето на словото си им поревнувал; со бденијата, постот и молитвите си се вброил меѓу преподобните, со кротост поднесувајќи клевети и понижувања. Затоа Христос те прослави со чудеса, кои обилно ги излеваш врз сите кои со вера прибегнуваат кон тебе; спаси не сега и нас со твоите молитви, о, пречудесен Јоване, светителу Христов!
Кондак, гл.4
Следејќи Го Христа, Големиот Пастир, ти се покажа како прекрасен светител; зашто ги спаси своите овци од погибел од страна на незнабошците приготвувајќи им мирно пристаниште. И покажувајќи непрекидна грижа за своето стадо, ги лекуваше неговите душевни и телесни болести. Моли Го Христа Бога и за нас, кои паѓаме пред твоите скапоцени мошти о, оче Јоване: во мир да се спасат нашите души.
Известуваат верници при МПЦ Св.Петка (http://www.mpc-svpetka.com/
