Заради нас си се родил од Дева и распетие си претрпел, Благи, уништувајќи ја смртта со смрт и воскресението јавувајќи го како Бог. Не презирај ги оние што со раката Твоја ги создаде, но јави го човекољубието Твое, Милостиви. Прими ги молењата на Богородица, која Те роди и, спаси ги, Спасителу, луѓето од очајание.
Утрена, петта недела од Постот

Поуки од светите отци: Прави го ова во поглед на своите браќа: гледајќи дека вашето пријателство се раскинува, поитај сесрдно да го обновиш.
Свети Јован Златоуст

Молитва:
 Боже бесмртен, дај ни непрестајно да се угледаме на Исуса, Почетокот и Крајот на нашата Вера. Секогаш скрушено и скромно да Ти благодариме Тебе, борејќи се да бидеме деца Божји и преку молитвите и вечното застапништво на Пресветата Богородица, да се утврди нашата надеж и вера во Тебе. Амин

 Читање од Светото Писмо:
 Исаија 41, 4-14
 Битие 17, 1-9
 Соломонови Изреки 15, 20-34; 16, 3-9
 
 Созерцание: Остави ги на Господа делата свои и цврсти ќе бидат твоите намери.
Соломонови Изреки 16, 3

Подготви: А.Л.

 Од Православен календар на МПЦ     

Светите маченици Хрисант и Дарија
и другите со нив     01/04/2009

Хрисант беше единец син на еден велик бојарин Полемиј, којшто од Александрија се беше преселил во Рим. Како син на богати родители Хрисант ги изучи разните светски школи, а ги имаше за учители најучените луѓе. Но светската мудрост го збуни и го остави во неизвесност околу прашањето што е вистина. И тој тагуваше заради ова. А Бог Кој промислува за сите и за сѐ ја ублажи неговата тага: до рацете на младичот Хрисант дојдоа Евангелието и Делата Апостолски. Кога ги прочита се просветли со Вистината. Бараше учител и го најде во лицето на еден свештеник Карпофор, којшто го поучи и го крсти. Ова не му се допадна на Хрисантовиот татко, кој презеде сѐ за да го одврати од Христовата вера. Откако не успеа, злобниот татко најпрво се обиде да го разврати и го затвори младиот човек сам со бесрамни девојки. Хрисант се победи самиот себеси во ова и се одржа во чистота. Тогаш татко му го присили да се ожени со незнабожечката девојка Дарија. Хрисант ја поучи Дарија и таа ја прими Христовата вера и живееја заедно како брат и сестра, во привиден брак. Кога умре татко му, Хрисант почна слободно да Го исповеда Христа и да живее според Неговите заповеди, тој и сиот негов дом. Во времето на царот Нумеријан тој и Дарија беа страшно мачени за верата. Но и самиот мачител Клавдиј, којшто го виде трпението на овие маченици и чудата што се пројавија при нивното мачење, ја прими Христовата вера заедно со целиот свој дом. Зато и него го потопија во вода, обајцата синови му ги заклаа, а жена му откако се помоли на губилиштето издивна. Дарија беше толку истрајна во маките што незнабожците викаа: „Дарија е божица!“ Најпосле Хрисант и Дарија беа каменувани во еден длабок ров. На тоа место подоцна беше подигната црква. Близу ровот имаше една пештера во која еднаш христијаните се собраа на литургија во спомен на Светите маченици Хрисант и Дарија. Кога дознаа за ова незнабожците навалија и ја затворија пештерата, во која ги натераа во смрт дојдените христијани, а тие со ова се преселија во блажениот живот. Славните маченици Хрисант и Дарија и останатите што загинаа со нив, меѓу нив беше и еден свештеник Диодор и ѓаконот Маријан, пострадаа за Христа во Рим, во 283 и 284 година.