†СТЕФАН
По милоста Божја
Архиепископ Охридски и Македонски,
заедно со Светиот Архиерејски Синод, до свештенослужителите,
монаштвото и до сите верни чеда на Македонската
Православна Црква,
а по повод Божикните празнувања,
ИСПРАЌА МИР И БЛАГОСЛОВ ОД БОГА,
ПОЗДРАВУВАЈЌИ ГИ СО ВЕЛИЧЕСТВЕНИОТ И
ТОРЖЕСТВЕН ПОЗДРАВ
ХРИСТОС СЕ РОДИ!
Возљубени празникољубци,
Бог е со нас! - воскликнува на овој торжествен празник целата христијанска вселена, зашто оние кои беа во темнина - ја видоа светлината; оние кои беа во неволја и страдања - ја добија својата утеха и слобода; оние кои ја бараа смислата на животот - ја најдоа радоста на постоењето и го видоа отворањето на рајските порти.
Овој ден е денот што го очекуваа старозаветните пророци, денот во кој се надеваа праведниците и денот што им беше ветен на сите кои Го бараа Господа. Денешниов ден е тој ден - денот на Христовото рождество - денот со кој започна делото на Спасителот во светот. Но, денес е и денот кога се испитува и нашата љубов и нашата верност кон Него. Денес е денот од кога пак со нас е Бог, и, конечно, да разбереме сите народи, зашто, навистина, со нас е Бог!
Да се радуваме и да Го воспеваме новородениот Христос, Кој се јави за да донесе мир меѓу луѓето. Бог слезе на земјата, за да му даде можност на човекот да се воздигне на небесата. На денешниов ден се роди долго очекуваниот Емануил, светна Ѕвездата што го најавуваше изгревањето на „Сонцето на правдата”, се јави Утешителот на оние што страдаа, Избавителот на угнетените, Лекарот на болните, Надежта на онеправданите... Ете, зошто денешниов ден е ден за славословие, ден за радост и благодарење. Сонцето на правдата дојде за да му даде утеха на измаченото човештво, да го упати кон правда и вистина и со животворните зраци на божественото учење да ги загрее човечките срца и души. Затоа да пријдеме сите заедно и, придружувајќи им се на ангелите, да Му оддадеме слава на Господа Новородениот, со благодарност за неизречивата милосрдност и за Неговата бескрајна љубов.
На денешниов величествен ден го прославуваме рождеството на Синот Божји, Господ Исус Христос, Кој со Своето спасително дело кон човечкиот род, ги загреа срцата на пастирите во Витлеемската пештера, ги зарадува мудреците од Исток и го утеши сето Адамово потомство. Затоа, сите кои ја разбраа оваа вистина, еднодушно Го прославија новородениот Богомладенец, Го возвеличија Богочовекот Христос. Синот Божји зеде врз Себе човечко тело, за да го ослободи човештвото од оковите на гревот, од темнината и незнаењето, па, дарувајќи ни спасение, нè упати кон правда, вистина и живот.
Затоа да пријдеме и да се поклониме пред скромните јасли, кои блескаат од славата на Бога, зашто Младенецот Христос токму оттука го започна Својот страдален пат на земјата. Да се поклониме, зашто тука е почетокот на нашето спасение, почетокот на нашата вечност.
Христољубиви духовни чеда,
По доаѓањето на Богочовекот на земјата, ние луѓето ја знаеме својата должност, го препознаваме патот по кој треба да одиме. За таа цел ни се отворија небесата, светоста и совршенството повеќе не ни се далечни и непречено можеме да се насладуваме на вечната убавина и близина со Бога. И немоќните и духовно сиромашни не се веќе без надеж. Бог се јави во тело - Синот Божји стана и син човечки и се обнови некогашната заедница меѓу Бога и човекот. Бог се јави во тело - нема поголемо чудо во историјата на човештвото! Оној Кој е Бог, постанувајќи Богочовек, се изедначи со нас луѓето и со тоа ни го врати првоначалното достоинство.
Затоа Божик е денот кога особено се потсетуваме на Неговото велико и спасоносно дело. Божик е денот кога најмногу треба да бидеме со чувствата близу до Витлеемската пештера и да се радуваме за Радоста што се роди на овој ден. Празниците, всушност, затоа и постојат: да размислуваме за поводот што нè собира, да размислуваме колку знаеме за верата и колку го практикуваме тоа на што нè учи Светото евангелие!?
Возљубени чеда во Христа Богомладенецот,
На овогодишниот величествен и торжествен празник, богољубивите срца меѓу нашиот народ чувствуваат дополнителна радост, зашто нашите ученици веќе учат и ќе знаат што празнуваме на Божик, а што на Велигден и што на другите празници. Благодарение на надлежните институции, вероучението се врати во нашиот образовен систем како редовен предмет, со што на нашите најмлади им се даде можност да добијат сестрано воспитание и образование. Со изучувањето на вероучението оваа и идните генерации ќе добијат вистинска духовна надградба, зашто со запознавањето на верата на нашите постари, подобро ќе се запознаат себеси, поправилно ќе го осознаат својот идентитет, ќе се издигнат морално, па така, на правилен начин ќе го градат и општеството во кое живееме. Учејќи се и воспитувајќи се од божествената библиска толеранција, ќе научат да го почитуваат животот, како и оние што на некој начин се поразличен од нив.
Библијата нè учи дека Бог го создал човекот според Својот образ и подобие, што значи дека при создавањето, покрај божествените својства, како што се љубовта, добрината, мудроста и правдољубивоста, на човекот му е дарувано да биде и сотрудник Божји во создавањето на нов живот. За нас, православните христијани, животот и семејството се тесно поврзани меѓу себе, па затоа нашата Света црква го поддржува повикот до родителите да раѓаат повеќе деца. Живееме во времиња со незапамтен пад на наталитетот кај нашиот народ. Затоа нашата Македонска Православна Црква, тргувајќи од мајчинската грижа за своето паство, а и согласно правилата и учењето на Светото првославие, во никој случај не го оправдува насилното прекинување на зачнатиот живот во утробата на жената. Токму и на овој ден, на денот на Божјото рождество, да се потсетиме на светоста на животот и на потребата од повеќе рожби во македонските семејства, зашто единствено тоа ќе н è спаси од можноста да исчезнеме како нација.
Возљубени чеда во Господа,
Како ваши духовни пастири посакуваме во мир, љубов, радост и во меѓусебно разбирање да ги прославиме божикните и престојните празници. Вечните духовни вредности, кои извираат од нашето Свето Православие и нашите древни традиции, нека станат наше секојдневие. Да ги прифатиме како основни критериуми во нашиот живот, опстојувајќи постојано во верата, љубовта и надежта. Врз овие добродетели да ги градиме нашите постапки во животот. За сè пример имаме во вечниот Богомладенец, во Богомајката - Пресвета Дева Марија и сите светии. Просветени од светлината на денешниов празник, да воскликнеме заедно со ангелите: „Слава на Бога во височините, а на земјата мир и меѓу луѓето добра волја”.
Испраќајќи ви архипастирски благослови и честитки, вам, возљубени чеда на нашата Света црква, во Татковината и насекаде по светот до каде што нè има како род македонски, Му се молиме на новородениот Богомладенец да останете цврсти во нашата прадедовска православна вера и светиклиментовиот дух секогаш да биде во вашите души и мисли.
Христос се роди! Навистина се роди!
Нека ни е честито и од Бога благословено Новото лето Господово.
АРХИЕПИСКОП
ОХРИДСКИ И МАКЕДОНСКИ
†СТЕФАН
заедно со членовите на Светиот архиерејски синод
на Македонската Православна Црква
КИРИЛ, Митрополит Полошко-кумановски
ПЕТАР, Митрополит Преспанско-пелагониски и
администратор Австралиско-новозеландски
ТИМОТЕЈ, Митрополит Дебарско-кичевски
НАУМ, Митрополит Струмички
АГАТАНГЕЛ, Митрополит Повардарски
МЕТОДИЈ, Митрополит Американско-канадски
ПИМЕН, Митрополит Европски
ИЛАРИОН, Митрополит Брегалнички
ГОРАЗД, поранешен Митрополит Европски
КЛИМЕНТ, Епископ Хераклејски
На Рождество Христово - Божик,
2008 лето Гос подово.
