Нови  писма од Груевски до Метју НИМИЦ и  до  БАН КИ-МУН

И МПЦ во пакет со името

Премиерот Никола Груевски испратил ново писмо до посредникот Метју Нимиц, во кое бара дел од пакетот решенија да биде и грчко признавање на Македонската православна црква.

Македонија ќе се обиде во евентуалното решавање на спорот за името да го вклучи и решавањето на црковниот спор што Македонската православна црква го има со Грчката православна црква.   Премиерот Никола Груевски, како што дознаваме од дипломатски извори, испратил ново писмо до посредникот Метју Нимиц, чија содржина главно е посветена на односите ГПЦ-МПЦ и во кое бара дел од пакетот решенија да биде и признавање на македонската црква. По отворањето на прашањето за македонското малцинство, писмото е вметнување на уште една тема како дел од разговорите за името.„Ве молам, ако е можно, да го вклучите ова прашање во Вашите обиди за решавање на спорот со нашето уставно име, а од неодамна обременето и со повеќе други отворени прашања, и ако Вашите напори резултираат со успех, а имајќи предвид дека покрај името постои расположение од Ваша страна да решите и повеќе други отворени прашања помеѓу Република Македонија и Република Грција, ова прашање да го вброите во редот на нашите приоритети“, му пишува Груевски на Нимиц.Тој во писмото му излага на посредникот подолга елаборација и историјат на црковниот спор што МПЦ го има со дел од православните цркви, главно со српската и со грчката црква, притоа нагласувајќи ја нивната блискост и солидарност. „По долги дискусии и преговори, според информациите што ги добив од МПЦ, се констатира дека корените на проблемот лежат повторно во спорот што го наметна Грција и е поврзан со нашето уставно име. Имено, Српската православна црква (СПЦ) меѓу другото е солидаризирана со ГПЦ, бидејќи значаен дел од Синодот на СПЦ се образовани и долго време поминале во црквите и манастирите во Грција, каде што стипендирани од фондовите на ГПЦ до денес останале под нивно силно влијание па поради нивното дејствување од умерената струја на епископи се наречени грчко крило“, објаснува Груевски.

Во образложението зошто му пишува вакво писмо, македонскиот премиер вели дека писмото никогаш не би го напишал ако црквата и државата и во Грција беа одвоени како што е во Македонија и во повеќето европски земји. Но, според Груевски, кај нашиот јужен сосед постои „силна спрега“ помеѓу црквата и државата.„Убеден во Вашите искрени напори да му помогнете на регионот и во обидите на ООН да најде решение за повеќегодишниот спор, нагласувам дека прашањето поврзано со црквите го отворам исклучиво поради односот на грчките власти и ГПЦ, кој е далеку поблизок, посоработувачки и со значително поголемо влијание отколку во која било друга држава во ЕУ и во НАТО, со почитување на правото на секоја држава да си го уредува внатрешниот систем. Само во таков контекст и само во таква рамка Ве молам да го разберете отворањето на ова исклучително сензибилно, но и важно прашање за Република Македонија.“

Вчера во Владата не сакаа да го коментираат последното писмо што премиерот му го испратил на Нимиц. Оттаму само кусо изјавуваат дека се надеваат оти Нимиц ќе ги земе предвид барањата и приоритетите на Македонија во потрагата на компромисно решение за спорот.Освен до Нимиц, Груевски во текот на минатата недела испратил и ново писмо до Бан Ки-мун во кое го известува за прекршувањето на Приремената спогодба од Грција со ветото во Букурешт и за „чекорите на Атина во последните неколку месеци поврзани со прекинување и отежнување на економските врски, протокот на стоки, луѓе, забавувањето и оневозможување на транспортот, отежнувањето на културната соработка, како и загрозувањето на личната безбедност на македонски граѓани во Грција“.

Да се преименува солунскиот аеродром

Како што „Дневник“ веќе пишуваше, Македонија побарала од Грција да го преиспита преименувањето на солунскиот аеродром „Микра“ во „Македонија“. Потврда за ваквите информации е последното писмо на Груевски до Нимиц, во кое се вели:„Би сакал да нагласам дека не се чувствуваме пријатно кога илјадници туристи со збунетост прашуваат зошто името на нашата држава, нашиот сосед го користи за име на аеродромот во Солун. Оттука, Ве молам уште еднаш, имајќи предвид дека со последната Ваша идеја покажавте амбиција, покрај прашањето за името, да отворите и повеќе други прашања вклучувајќи го и името на нашиот аеродром ‘Александар Велики’, да го вклучите и ова важно прашање“.

Сашо Кокаланов-Дневник

Посети: {moshits}