с.Матка,23ти декември 2019 лето Господово- манастир Успение на Пресвета Богородица

 По повод упокојувањето на сестрата наша во Христа, расофора Анастасија, денес 23.12.2019 во манастирот Успение на Пресвета Богородица - Матка се отслужи Заупокоена Литургија и Погребение.                                                                                                                                                    

      Нека Семилостивиот Бог ја упокои нејзината душа таму каде што почиваат праведниците. Вечен нека и е споменот!

***

(Христос, вистинскиот Бог наш, Кој воскресна од мртвите и владее над живите и мртвите, по молитвите на Својата Пречиста Мајка, на преподобните и богоносни отци наши, и на сите свои светии, душата на починатиот Свој слуга да ја всели во населбите на праведниците, да ја упокои во лоното Авраамово и кон праведниците да ја присоедини, и нас да нѐ помилува – како добар и Човекољубец.)

(Во Царството Твое спомни си за нас, Господи, кога ќе дојдеш во Царството Твое.
Некогаш Адам, откако вкуси од плодот од дрвото беше истеран од рајот, а разбојникот кој на крстот висеше, откако Те исповеда како Бог, влезе во рајот. И ние, спасените со Твоето страдање, Господи, угледувајќи се на разбојникот, со вера Ти повикуваме: спомни си за нас, кога ќе дојдеш во Царството Твое.

Стих: Блажени се чистите по срце, зашто тие ќе Го видат Бога.
Земајќи прав од земјата, Оној што ме создаде, го создаде телото мое со божествената волја, и вдахнувајќи душа во него со Својот живоносен здив, Он ја постави под света заповед. Мене, ужасно потчинетиот на гревовната распадливост, Ти, поради безмерното милосрдие, ме повика оттаму.  

Стих: Блажени се миротворците, зашто тие ќе се наречат синови Божји.
Ужасна и страшна тајна за сите, кога душата од телото се разлачува: душата тогаш заминува, а телото се предава на земјата и се погребува. Затоа и ние, дознавајќи за последното заминување, да поитаме кон Спасителот, повикувајќи со солзи: спомни си за нас, Господи, кога ќе дојдеш во Царството Твое.

Стих: Блажени се гонетите заради правда, зашто нивно е Царството Небесно.
Зошто толку страшно ме оплакувате, о луѓе? Зошто напразно се јадосувате? Претставениот на сите им објавува: смртта на сите им е покој. Да го слушнеме и гласот на Јона, кој вели: смртта е покој за човекот. Но упокој го, Боже, со Светиите оној што си го зел.
Стих: Блажени сте вие кога ќе ве срамат и гонат, и кога ќе говорат против вас секакви лоши зборови лажно – заради Мене.
Семудриот Павле јасно го претскажа претставувањето на сите, учејќи дека мртвите ќе станат нераспадливи, а ние ќе се измениме според Божјата заповед. Тогаш и онаа страшна труба ќе затруби, и ќе ги подигне од сонот сите кои од дамнина се упокоени. Но упокој го, Боже, со Светиите оној што си го зел.

Стих: Радувајте се и веселете се, зашто голема е наградата ваша на Небесата.
Претставениот, и во гробот лежејќи мртов, спокоен, на сите им довикува: дојдете земнородни кон мене, погледнете ја телесната убавина како потемнела. Затоа, браќа, познавајќи го крајот по неа, да поитаме кон Спасителот, со солзи повикувајќи: упокој го, Боже, со Светиите оној што си го зел.

Богородичен: Натприродно, Владичице, во Твојата утроба си Го зачнала бессемено Предвечниот Бог, и во тело си Го родила Него – Бог и Човек, непроменливо и неслиено. Затоа и ние, знаејќи Те секогаш за Богородица, со вера повикуваме кон Бог, Кој од Тебе се роди: спомни си за нас во Царството Твое.)

 Преминпортал (к.т./Сестринство на манастирот)

 Друго:

Од архивата на Преминпортал:

1. Матка 2009 г.

 П.П. 2019 г.