Во Штип се градат 6 цркви, поставен камен темелник за „Св.Константин и Елена“ (02.06.2013)

Митрополитот на Брегалничката епархија, г.Иларион во придружба на свештени лица од епархијата денес ги осветија темелите на новата црква која се гради во Штип. Црквата се вика „Св.Константин и Елена“ и е лоцирана до споменикот на егзодусот на Македонците од Егејска Македонија кој се наоѓа во населбата „Балканска“.

Ктитор на црквата е познатиот штипски бизнисмен, Ване Богдов инаку сопственик на текстилната конфекција „Вабо“. На чинот на поставување на камен темелник присуствуваше и градоначалникот на Штип, Илчо Захариев кој изјави:

- Во моментов во Штип се градат 6 цркви. Две во населбата Баби, потоа кај Три Чешми, на излезот во населбата Железничка а има уште две локации кои наскоро ќе бидат утврдени за изградба на уште две цркви. Денес е празник за Штип, и јас сакам само да ја искористам можноста да ги повикам штипските бизнисмени да донираат, да поддржуваат изградби на цркви, и не само на цркви туку и на други објекти кои ќе помогнат заеднички да го направиме Штип поубав град.

Митрополитот Иларион напомена дека цркквата се гради на датум кога се одбележува јубилејот од воспоставувањето на христијанството како доминантна религија во христијанскиот свет и уште поубав повод е што го носи токму и името на втемелителот Светиот Константин:

- Нашата Света црква продолжува со божји благослов, преку благородни семејства, какво што е на сограѓанинот Богдов, во спомен на неговите родители, да гради цркви во кои ќе се проповеда нашата света Православна вера. Не треба да заборавиме дека ние, кои на Европа им дадове вера, писменост и слово, денес се соочуваме со негации кои се во спротивност со нашиот опстанок. Но ќе издржиме, бидејќи така било со векови. Нашиот народ има сила и ќе преживее се што се случува во нашата татковина предизвикано од нашите негатори.

На свечениот чин присуствуваа видни личности од општествено-политичкиот живот на Штип, кои посакаа идната година да се соберат на отворање на црквата.