Скопје, 31 јануари- на празникот на св. Атанасиј
На левиот брег на реката Вардар во Скопје, во непосредна близина на кејот кај некогашната Градска автобуска станица, денеска на празникот свети Атанасиј беше осветена обновената катедралната црква „Раѓање на Пресвета Богородица“.
Осветувањето го изврши Архиепископот Охридски и Македонски г.г. Стефан во сослужение на членовите на Светиот архиерејски Синод на МПЦ митрополитите Кирил, Петар, Агатангел, Иларион, Гораст и повеќе свештенослужители од скопската и другите епархии на МПЦ. На осветувањето присуствуваше и премиерот Никола Груевски. По осветувањето беше отслужена Божествена Литургија, на која што покрај горенаведените Владици присуствуваше и Митрополитот Струмички г. Наум.
- Да Му благодариме на Бога, по молитвите на Пресвета Богородица, што ни го дарува овој ден за радост на благочестивите христијани во Скопје и Македонија, за радост на сите богољубиви луѓе, за радост на земјата и небото и на целата Божја Црква. Негова основна цел е да им го доближува Бога на луѓето, како и меѓусебно да ги зближува, рече архиепископот Стефан.
Тој додаде дека со денешниот чин на осветувањето, конечно, се исполниле желбите на многу побожни скопјани, кои посакуваа да се возобнови некогашниот катедрален храм, кој со децении бил духовен столб и место за духовна поткрепа на многу скопски и македонски генерации.
Ктитор на обновениот храм е скопскиот градоначалник Трифун Костовски со чии средства целосно е возобновен храмот со камбанаријата, внатрешното и надворешното уредување. Тој од МПЦ го доби орденот „Свети Климент Охридски“ и благодарност за неговото дело.
- За мене и моето семејство ова претставува најголемо признание. Со денешниот чин се одолживме на нашите предци, а воедно овој чин е и завештение на идните поколенија. Убеден сум дека обновата на овој храм ги исполни срцата на сите скопјани, а воедно и на сите христијани во Република Македонија, рече Костовски.
Црквата, што се градеше четири години, е лоцирана на просторот на истоимениот храм осветен во 1835 година, кој во Втората светска војна во 1944 година беше опожарен и уништен. Храмот е со катедрални димензии. Иако не е целосно завршена, главните престолни икони потребни за осветување се поставени. Останува да се доврши мермерниот иконостас и да се фрескописаат ѕидовите на храмот.
Ова е трета црква во Скопје посветена на Мајката божја Богородица, позната како заштитничка на градот. лѓ/паг/12:22
