Скопје, 7 август (МИА) - Четириесет и вториот Меѓународен семинар за македонски јазик, литература и култура оваа година ќе се одржи од 10 до 27 август во Охрид, во Конгресниот центар на Универзитетот „Св. Кирил и Методиј“, под покровителство на министерката за култура Елизабета Канческа-Милевска.
Ректорот на Универзитетот „Св. Кирил и Методиј“ Велимир Стојковски на денешната прес-конференција посочи дека на семинарот ќе учествуваат 90 слушатели, странски слависти, македонисти, балканисти, историчари, етнолози, универзитетски професори, научни работници, преведувачи и студенти по македонистика, славистика и по балканистика од 27 земји.
- Првпат државата го финансира семинарот со повеќе средства, отколку што беше минатите години. Оваа година од Министерството за образование и наука има 2,6 милиони денари и 400.000 денари од Министерството за култура, а семинарот чини околу 5 милиони денари, рече Стојковски.
Ректорот Стојковски изрази надеж дека финасирањето на семинарот ќе продолжи и дека ќе се најдат можности и за финасирање на лекторатите во странство зашто тие се од интерес на Република Македонија.
Директорката на семинарот проф. д-р Емилија Црвенковска рече дека на собирот во Охрид главен акцент ќе биде изучувањето на македонскиот јазик и оти затоа тој се одржува, да се воведат сите учесници од странство во тајните на нашиот јазик.
Таа додаде дека учесници на семинарот се главно студенти кои го изучуваат македонскиот јазик во лекторатите низ светот, но оти ќе има и бројни научни работници, како истакнатите македонисти академиците Ала Шешкен од Русија и Иван Доровски од Чешка, професорите Кшиштоф Вроцлавски и Јан Соколовски од Полска, Волф Ошлис од Германија, Стивен Френкс од САД и други.
- Наставата ќе се одржува со задолжителни секојдневни лекторски вежби, курсеви по избор од македонскиот јазик, македонска литература, старословенски јазик, археологија, како и курс по народни ора. И оваа година продолжува со работа преведувачката работилница, а ќе се работи превод од и на руски, англиски и полски јазик наспрема македонскиот. За слушателите се предвидени и по едно до две предавања дневно од областа на македонскиот јазик, литература, култура и историја што ќе ги одржуваат еминентни специјалисти од земјава, рече Црвенковска.
Таа посочи дека новина во програмата е драматуршката работилница што ќе ја води истакнатиот драмски автор Горан Стефановски и оти по првпат се организира и претставување на млади научни кадри кои покажуваат резултати во областа на македонскиот јазик и култура.
Во рамки на семинарот, на 24 и 25 август ќе се одржи и 36-та научна конференција, која работи во две секции - лингвистичка и литературна. Темите на лингвистичката секција се „Лексичката синонимија во македонскиот јазик“ и „Структурата на простата реченица во дијалектите на македонскиот јазик“. Темите на литературната секција се „Научното и критичкото дело на Димитар Митрев“ и „Македонската литература во европски контекст“. На конференцијата ќе учествуваат околу 70 научни работници од земјава и од странство.
На семинарот ќе бидат претставени повеќе изданија, како собраните дела на Милан Ѓурчинов, Антологијата на македонскиот расказ во превод на руски од Олга Пањкина.
Семинарот и оваа година има сопствена издавачка дејност, покрај редовните изданија од минатогодишните предавања и од Научната конференција, издаден е и учебник по македонски јазик за странци, како и збирка со народни песни.
Во културната програма на Меѓународниот семинар ќе се претстават истакнати уметници од Македонија, поетите Гане Тодоровски и Матеја Матевски, а ќе биде претставено и творештвото на скулпторот Томе Серафимовски. Ќе бидат прикажани и неколку македонски филмови.
За слушателите на семинарот ќе се организира посета на значајни археолошки локалитети, музејски збирки и претставување на најновата македонистичка издавачка продукција. За учесниците на Меѓународниот семинар се организираат и екскурзии за запознавање со природното и културното богатство на Македонија. мд/са/11:48
