Маркова Сушица, 5 февруари 2012 год.- Манастир на св.вмч. Димитриј

Оваа недела Светата Православна Црква со четивото за фарисејот и митарот почнува да нè подготовува за Великиот пост. Истакнат е лицемерениот и наемнички однос на фарисејот кон Бога наспроти покајниот однос на митарот (цариникот).

Фарисејот е убеден дека Го задолжил Бога само со почитувањето на Писмото и затоа Бог треба да му проштева. За жал, ваквиот однос го имаме се повеќе и денес меѓу христијаните кои извршуваќи ги ритуално Светите преданија на Православната Црква сметаат дека завршиле сè и дека се исправни пред Бога.

Додека, митарот знаејќи си ги сторените гревови се плаши дури и да го крене погледот кон Богам, а не да застане поблизу до Него.

Да се запрашаме себеси – дали се препознаваме во некој од ликовите на оваа приказна?

Да внимаваме да не западнеме и самите во стапицата како фарисејот.
Мораме да бидеме свесни дека е неизбежно секојдневно да грешиме. Како што не можеме да станеме наутро од постелата и да го поминеме денот, а да не ни се извалкаат рацете. Па, како што внимателно пред секое јадење ќе си ги измиеме рацете, уште повнимателно да се исповедаме и покаеме од длабочината на нашето срце.

Во таа смисла во предстојниве недели достојно да се подготвиме за Велигденскиот пост. Внимателно да ги проследиме и восприемиме пораките од неделите на Блудниот син, Меспусната и Сиропусната (Прочка).

Оваа недела се блажи целата па сме ослободени од постот во среда и петок.

По Литургијата, охрабрените верни се спротивставија на зимските окови и направија продуховена прошетка до остатоците од древната црквичка во близината на Марковиот манастир. На темелите на црквичката се одпеаа песни и молитви во слава на Бога. Попатно, селаните од Малчишта со кафе радосно ги почестија поклониците.

За Преминпортал

Ратислав Кардалев