Со Христос низ животот, во Животот
Свети Николај Охридски и Жички
Помилуј не, Исусе, Сине Божји, зашто само Твојата милост може да не спаси. Не оставај нè самите на себеси, зашто без Тебе не можеме да направиме ништо, не отстапувај од нас, за да не станеме плен на адот. Но, брзо дојди ни на помош и спаси не.
Зависен сум од Него
Тој ми дарува живот. Тој непрестајно ме допира со Својот Животворен Дух. Од тој божествен допир, мојот живот гори, постои и трае во мене. Богоборниот дух, таткото на секоја лага, ме искушува со земните похоти. Ми шепоти дека мојот живот зависи само од земниот леб и другите земни блага. Правејќи се мој пријател, поголем од мојот Создател земајќи ме во заштита од Него - како првите родители во Рајот - ми вели: да те сакаше, сите камења ќе ти ги претвореше во леб!
Јас знам, и кога моето тело би умрело од глад без леб, мојот живот нема да умре. Затоа што мојот живот е скриен во Него и Тој е скриен во мојот живот. И кога сите камења би се претвориле во леб, а јас го изедам сиот тој леб, мојот живот не би бил ниту подолг, ниту поголем. Ете, мерката на мојот живот е вечноста, а не мноштвото денови во времето.
Зборовите на мојот Создател ми се послатки од лебот и медот. Детето оставено во далечина повеќе се радува на гласот на родителите отколку на лебот. Залутаната овца во планините вознемирено глода тревка по тревка, постојано ја крева главата и го бара гласот на својот пастир. И штом ќе го слушне гласот на пастирот, таа престанува да ја гризе тревата и трча кај својот пастир. Така, секое појавување на Небесниот Отец го весели и го утврдува мојот живот. Неговите зборови се мојата омилена трпеза.
Човек не живее само од леб, туку и од секој збор што излегува од устата на Бога. (Матеј 4:4)
Во Него е мојата слава
Каде што е злобата, таму е безумието. Злобниот дух ми предлага слава од светот и пред светот. Сите негови предлози се насочени кон тоа да го засрамат Создателот Бог, а јас да умрам засекогаш.
- Скокни од врвот на црквата! - шушка таа змија одоздола. Или: дигни се во воздухот и летај! Или: нурни до дното на морето и извади го песокот! Со други зборови: направи нешто што другите луѓе не можат да го направат, па светот да те пофали! Не плаши се, твојот Бог ќе те поддржи во тоа. Обичноста е досадна; напредокот се состои во необичното, новото.
Тоа е таа иста лажлива усти која им говореше на нашите прародители: оттргнете се од Бога и ќе бидете Богови! Какво лудило! Ако од неговото огниште отпадне загреана жар, ќе остане ли жар, а не ладен и црн јаглен, над кој без страв ќе лази секој црв?
Мојата слава е во мојот Господ. Ја гледам како ноќен патник во светлината на румените зори. Таа ме осветлува. Таа ме прави среќен. Таа ме чека. Кога би барал слава поинаква од Господовата, би барал лага наместо вистина и би го искушувал мојот Господ.
Напишано е исто така – Не искушувај Го Господ, Твојот Бог. (Матеј 4:7)
Тој е моето единствено вистинско богатство
Каква корист ќе имам од широките имоти на земјата, кога гробот ќе биде доволен за моето тело? Зошто ми се потребни сите земни царства, кога душата не може да се насити или да се задоволи со нив? На моето тело му треба многу малку од она што го дава светот, а на мојата душа и треба повеќе отколку што може да и понуди целиот универзум. Ако на себе ги натрупам сите бисери и сето злато на светот, ќе бидам смешен и повторно - смртен. Зошто да си ја измачувам душата со залудни работи?
Тој е со мене
Тој ме создаде – Тој знае зошто. Ме одржува во живот – Тој знае како. Ќе ме одмори по смртта – Тој знае каде. Од што треба да се плашам? Од светот, или смртта, или сатаната, или луѓето? Тој го победи светот. Тој стана од гробот. Го виде сатаната како паѓа во пропаст. Тој ги освои луѓето. Ако во моментот ме обзема страв, се сеќавам на Неговите победи и мирот влегува во мојата душа. Ако понекогаш треперам, се сеќавам на Неговата близина и радоста го зајакнува моето срце.
И ете, Јас сум со вас преку сите дни до свршетокот на светот. Амин
( Матеј 28:20 )
Тој ме чека
Очајни безбожници!Тие говорат дека нив ги чекаат црвите. Тие тврдат дека нивниот пат на земјата е од мајмун до црв. О, колку сум посреќен од безбожниците! Знам дека мојот животен пат е од Бога кон Бога. Бог ме испрати, и Бог го чека моето враќање.
Се обидувам да се вратам како син, а не како наемник. Наемникот ја добивал својата плата во овој век. А синот треба да влезе во богата татковина. Сакам да се вратам како син. Се облекувам како невеста за свадба. Ги облеков сите тие украси, кои знам дека му се допаѓаат. Затоа што мојот Татко е голем Цар, опкружен со големи луѓе. Таму ми одредил и место. Само чека да се облечам за да ме земе. Стојам зад завесата и се облекувам а срцето ми трепери од радост. Ја чувствувам близината на средбата.
Знам,Тој ме чека пред вратата. „Ете, стојам пред вратата!“ (Отк. 3:20).
Тој ми го очисти домот
Еден патник сврати кај мене во конакот. Носеше празна вреќа под пазувите. Тој вечераше со мене, и јас заспав. Следниот ден ме разбуди вревата на градските чувари. Ми велеа, дека патникот ме ограбил. Го виделе, велат, како подгрбавен до земја носи полна торба со работи од мојата куќа. Трчале по него:но не го стасале. Одел лесно, но неговите чекори биле огромни. Кога излегол од градот, ја запалил вреќата и се изгорело. Останал чист бел пепел, а тој исчезнал.
Разгледав низ мојот дом и видов дека се е во ред. Сите работи на број. Целата куќа беше исчистена, окадена и намирисана. Сè беше во подобар ред отколку што беше вчера. И се чувствував полесен, посветол и порадосен од порано. Се чувствував окрилено. Срцето ми пееше. „Господа, ноќни стражари“, им реков. „Тој патник не ми украде ништо. Ми го исчистил домот, а само ѓубрето го извадил од куќата. И му благодарам што го запалил ѓубрето со оган“. Домот – тоа е мојата душа. Ѓубрето - тоа се моите гревови. А патникот – тоа е Он.
„Еве Го Јаг¬нето Божјо, Кое ги зеде гревовите на светот врз Себе! (Јован 1:29)
Помилуј не, Исусе, Сине Божји, зашто само Твојата милост може да не спаси. Не оставај нè самите на себеси, зашто без Тебе ништо не можеме, не отстапувај од нас, за да не станеме плен на адот. Но, брзо дојди ни на помош и спаси не.
И дарувај ни ја благодатната сила на Твојот Свети Дух, како што и си ја дарувал на Твоите Свети апостоли и Угодници. За да можеме да бидеме очистени и исцелени и просветлени и повторно родени од Твојот Дух. И да можеме, како деца на светлината, подобно на Ангелите, да Те славиме и фалиме Тебе, нашиот Спасител, со Отецот и Твојот Свети Дух.
И да можеме, со подготвена и украсена душа, како невеста со запалени свеќи на духот, радосно да го дочекаме крајот на ова земно патување и да се преселиме во Твоите небесни дворови, подготвени од почетокот за оние што Те сакаат. Милостиво слушни го нашиот покајнички глас и слушни нè преку молитвите на Твојата Пречиста Мајка и на сите Твои Светии.
Амин.
Свети Николај Охридски и Жички
prijateljboziji.com
За Преминпортал Симеон Стефковски
3ти февруари 2023 лето Господово